Wan – Baroya Wanê û Navenda Mafên Jinan der barê rapora zêde ya têkildarî mirina Rojîn Kabaiş de diyar kirin ku gumanên di rapora otopsiyê de hîna nehatine çareserkirin.
Cenazeyê Rojîn Kabaiş a xwendekara Beşa Pêşdebirina Zarokan a Zanîngeha Yuzuncu Yilê ya Wanêku di 27ê Îlonê de ji wargeha ku li dima derket û careke din agahî jê nehat girtin, ji aliyê Mehmet Emîn Ankay (60) ve di 15ê cotmehê de li Taxa Mollakasimê hat dîtin. Li gorî encamên otopsiyê sedema mirina Rojîn Kabaîşê xeniqîna di avê de hat diyarkirin. Rapora zêdekirî a xwendekara zanîngehê Rojîn Kabaîşê jî derket. Di raporê de hat îdîakirin ku Kabaîş roja ku winda bûye jiyana xwe ji dest daye û ji wê rojê ve di avê de bûye.
Li ser îtîrazan rapora zêde hatiye derxistin
Baroya Wanê û Navenda Mafên Jinan di derbarê vê rapora zêdekirî de daxuyaniyek belav kir û da zanîn ku di rapora Saziya Tipa Edlî (ATK) de laşê Rojîn Kabaîşê çend rojan di avê de maye de ti agahî nehatin bidestxistin û gotin: “Nehate tespîtkirin ku ava ku bûye sedema xeniqandinê ava Gola Wanê ye yan na. Di derbarê rengê laşê Kabaîşê de agahiyên berfireh nehatine parvekirin û gelek tiştên biguman ên bi vî rengî derketin holê. Di dema otopsiyê de stûyê Rojîn ê ji aliyê bijişkê me yê çavdêr ve hate nirxandin. Di dosyayê de îtîraz û daxwazên me yên berfireh ên der barê nehiştina şîrove, agahî û nirxandinan û mijarên din de hene. Li ser îtîrazên me ji Saziya Tiba Edlî raporek zêde hat girtin.”
Di rapora zêdekirî de ev xal derketin pêş
Di daxuyaniyê de madeyên rapora zêdekirî hatin parvekirin û made wiha rêz kirin:
“* Profîlên DNAyê nehatin tespît kirin û ti encamek nehat bidestxistin ku ew aîdê kê ye,
* Ti delîlên tibbî yên derbarê mirina travmatîk de nehatine bidestxistin,
* Delîlên tibbî yên mirina bi jehrî nehatine dîtin,
* Li ser cenazeyê Rojîn Kabaîşê delîlek bijîşkî tune ye ku berevaniya zayendî hatiye binpêkirin,
* Hat diyarkirin ku dibe ku mirin di 27ê Îlona 2024an de ku roja windabûnê ye pêk hatibe û di vê heyamê de cenaze di avê de mabe.”
‘Em ê şopdarê dosyayê bin’
Di daxuyaniyê de hat destnîşankirin ku daxwaz û îtîrazên berfireh ên der barê hemû mijarên hiqûqî û tibbî de ku di rapora ATKê de cih negirtine û dê ronîkirina mirina Rojîn Kabaişê hêsan bike, ji aliyê wan ve bi hûrgilî pêşkêşî dosyayê hatine kirin û wiha dawî kir: “Em careke din destnîşan dikin ku em ji roja ewil ve dosyaya Rojîn Kabaîşê dişopînin û em bi rêzdarî ji çapemenî û raya giştî re radigihînin ku heta rastiya maddî ya dosyayê derkeve holê em ê bi baldarî û kedkar bixebitin.”
