Saziyên jinan ên Amedê bertek nîşanî kuştina jinan dan. Jinan diyar kirin ku dibêjin sala 2025an sala malbatê ye lê em dibînin ku di sala 2025 bû sala kuştina jinan.
Li Amedê di nava meha tîrmehê de 3 jin hat kuştin. Herî dawî li navçeya Sûrê ya Amedê jina bi navê Hêlîn Eren a ducanî ji aliyê Siyabend Şeker ku bi mehra olî pêre zewicî bû ve hat kuştin. Li dijî kuştina jinan saziyên jinan li navçeya Yenîşehîra Amedê pêşiya Komeleya Jin a Rosayê daxuyanî hat dan. Daxuyanî ji aliyê Seroka Komeleya Jinan a Rosayê Suzan Îşbîlen ve hat xwendin. Di daxuyaniyê de endam û rêveberên saziyên civakî û gelek jin tev li bû.
‘Em li vir in’
Suzan Îşbîlen diyar kir ku îro jin dîsa bi kuştina jinekê re rabûn û wiha axivî: “Li Tirkiyeyê her ku diçe jiyana jinan tê astengkirin. Kujer aşkere ye. Bêcezakirina kujeran polîtîkaya dewletê ye. Yên ku jinan naparêzin berpirsyarên kujeran e. Di meha tîrmehê de li Amedê 3 jin hatin kuştin. Ev tevahî kuştin polîtîk in. Lê em li vir in. Em e her qadê dengê xwe bilind bikin. Em ji dest maf û jiyana xwe bernadin.”
Paşê aktivîsta TJAyê Bahar Peker axivî. Bahar Peker diyar kir ku ew li dijî qetilkirina jinan li vir in û wiha axivî. “Her roj li Amedê jin tê qetilkirin. Em qetilkirina jinan şermezar dikin. Divê cezayên herî giran biin kujerên jinan. Tê gotin di sala 2025an sala malbatê ye lê em dibînin ku di sala 2025 bû sala kuştina jinan.”
Piştî daxuyaniyê jin derbasî şîna Helîn Eren a ku navçeya Yenîşehîrê hatiye danîn, bûn.
