Serdozgeriya Komarê ya Dadgeha Bilind xwest cezayên di doza cînayeta Narîn Guranê de bên erêkirin.
Zaroka bi navê Narîn Guran di 21ê Tebaxa 2024an de li gundê Çûlî yê bi ser navçeya Rezanê ya Amedê ve winda bûbû û 19 roj piştre cenazeyê wê di rûbarê gund de hate dîtin. Cenazeyê Narîn Guranê di tûrikekî de li devê çemê gund hatibû dîtin. Têkildarî mirina Narîn Guran, li 8emîn Dadgeha Cezayên Giran a Amedê der heqê 4 kesan de doz hatibû vekirin.
Di dozê de, bi sedema “Bi awayekî hevpar zarokek bi qesdî kuştine” li mamê Narîn Guranê ê bi navê Salîm Guran ku mînaka DNA û mû di wesayîta wî de hatibû dîtin, li dayika wê Yuksel Guran û kekê wê Enes Guran cezayê muebbeta girankirî hate birîn. Li cîranê malbata Narîn Guranê yê bi navê Nevzat Bahtiyar ku piştî binçavkirinê li xwe mikûr hat ku cenaze biriye ber rexê rûbar jî ji ber sûcê “Delîlên sûc tune kiriye, veşartiye û cihê wan guherandiye” 4 sal û 6 meh cezayê hefsê hate birîn. 1emîn Daîreya Cezayan a Dadgeha Edliye ya Herêma Amedê, îtîrazên li dijî biryara 8emîn Dadgeha Cezayên Giran a Amedê ya di 28ê Kanûnê de dabû nirxand û di 26ê Gulanê de bi piraniya dengan erê kir.
Li dijî biryara erêkirinê, aliyan bi daxwaza betalkirinê serî li Dadgeha Bilind dan. Serdozgeriya Komarê ya Dadgeha Bilind jî ji bo erêkirina cezayan teblîxname amade kir. Teblîxname, ji 1emîn Daîreya Cezayan a Dadgeha Bilind re hate şandin.
