Amed – Komeleya Wêjekarên Kurd dê di 30ê Tebaxê de li taxa Fîskaya ya navçeya Yenîşehîrê ya Amedê ji bo Yekîtiya Demokratîk rewşenbîr û wêjekarên kurd li hev kom bike.
Rewşenbîr û Wêjekarên Kurd dê di 30ê Tebaxê saet 10:00an de li Tesîsên Civakî yên girêdayî Şaredarîya Bajarê Mezin a Amedê yên li Taxa Fîskaya ya navçeya Yenîşehîr a Amedê bi pêşengtiya Komeleya Wêjekarên Kurd bi minasebeta Yekîtiya Demokratîk bên cemhev. Endamê Komeleya Wêjekarên Kurd Helbestvan Gulêcan bal kişand ser banga “Aştî û Civaka Demokratîk” a Rêberê Gelê Kurd Abdullah Ocalan a 27ê Sibatê û xwest rewşenbîr, wêjekar, sîyasetmedarên kurd hemî bi ruhê yekîtiyê beşdarî bernameyê bin.
‘Em dikarin destê Rêberê Gelê Kurd xurttir bikin’
Helbestvan Gulêcan ji bo yekîtiyê bang li nivîskar, wêjekar, helbestvan û sîyasetmedarên Kurd kir û wiha got: “Ji bo yekîtiyê, ji bo yekîtiya Kurd û Kurdistanê em dikarin çi bikin? Pêvajoyeke girîng li pêşîya me ye û berpirsyarî ya wê heye. Di vê pêvajoyê de ya herî girîng yekîtiya gelê Kurd e, divê em piştgiriyê bidin pêvajoyê. Em ji hêla xwe ve gavên xurt biavêjin û em dikarin destê Rêberê Gelê Kurd Abdullah Ocalan xurttir bikin. Di vê pêvajoyê de divê em wêjekar û helbestvan weke dîrokzanan bêdeng nemînin û em piştgriyeke xurt bidin vê pêvajoyê.”
‘Gavên ku hatine avêtin ne bi dilê me ne’
Helbestvan Gulêcan di berdewama axaftina xwe de ev tişt gotin: “Ji destpêka pêvajoyê heya îro gavên ku hatine avêtin ne bi dilê me ne. Divê gavên xurttir bên avêtin. Astengiyên li pêşiya zimanê Kurdî, wêjeya Kurdî, weşangeriya Kurdî divê yek bi yek bên rakirin. Dîsa bi hezaran girtî hene, bi hezaran girtiyên nexweş hene divê bi awayekî lezgîn ji bo wan gav bên avêtin. Ji bo wê jî di serî de pêvajo pir girîng e. Divê di pêvajoyê de ne gavên hêdî, gavên bi pîvan û bi pêş ve werin avêtin. Em ji destpêkê ve weke Komelaya Wêjekarên Kurd vê pêvajoyê dinirxînin, dişopînin. Di wî aliyî de em bi hêza xwe ji vê pêvajoyê kêm nabin. Em dixwazin gelek gav bên avêtin, piştgirîya xwe ya ji bo pêvajoyê diyar bikin.”
Bangawaziya ji bo bernamê
Helbestvan Gûlêcan di dawîya axaftina xwe de wiha got: “Em weke hevalên ku pêşengtiya bernameya di 30ê Tebaxê de were lidarxistin dikin hatin bahev û gavên ji bo neteweya Kurd, yekîtiya gelê Kurd bên avêtin nirxandin, pêşnîyarên xwe amade kirin. Me pêşniyarên ji hêla wêjekar, nivîskaran ve hatin kirin nirxandin û em ê wan bikin mijara nîqaşan û pişt re têxin meriyetê. Divê em daxwazên civaka gelê Kurd, daxwazên civaka gelê Kurdistanê êdî pêk bînin. Di fikrî, bi pratikî em wan gavan bêxin meriyetê. Ev lezgînî heye. Ez bawer im wê girseyeke baş tev li bernameya me ya 30ê Tebaxê bibe. Piştî wê bernameyê em ê ji hêla wêjeyê, ji hêla zimanê Kurdî ve gavên xurttir biavêjin. Em ê heta dawiyê piştgiriya pêvajoyê bikin û ji bo gavên xurt bên avêtin em ê xebatên xwe bimeşînin.”
