Rojnamevanên jin ên Başûrê Kurdistanê, nerazîbûn nîşanî kuştina rojnamevan Nazim Daştan û Cîhan Bîlgîn dan û gotin: “Dewleta Tirk ji Çapemeniya Azad ditirse. Ti hêz wê nekaribe çapemeniya azad bêdeng bike.”
Li Navenda Metro ya Silêmaniyê, gelek sazî û rêxistinên cuda yên ragihandinê, derbarê êrîşa li ser rojnamevanên li Rojavayê Kurdistanê ku ji aliyê Tirkiyeyê ve hatine kuştin daxuyanî dan. Li ser navê rojnamevanên jin ên Başûrê Kurdistanê Tewar Adil axivî. Tewar Adil, diyar kir ku dewleta Tirk di tevahiya dîrokê de destê wî di nava xwîna Kurdan de heye û destnîşan kir ku gelê Kurd 100 sal in li dijî êrîşên dewleta Tirk li ber xwe didin. Tewar Adil, destnîşan kir ku çapemeniya azad li beramberî êrîşên dewleta Tirk a dagirker ên ser gelê Kurd, ji bo ronîkirina rastiyan rolek girîng û bandorker leyîstiye.
Tewar Adil herî dawî anî ziman ku hedefgirtina rojnamevanên azad ji aliyê dewleta Tirk ve derdixe holê ku ew dewletê çiqas ji rojnamevanên azad ditirse û got: “Me di dema borî de şahîdî ji şehîdxistina rojnamevanên jin Nagîhan Akarsel, Gulîstan Tara û Hêro Behadîn ji aliyê dewleta Tirk re kir. Em tekez dikin ku em ê li ser rê û şopa wan berdewam bikin.”
Li Wêranşarê jî daxuyanî dan
Tevgera Jinên Azad (TJA), Partiya Herêmên Demokratîk (DBP) û Partiya Wekhevî û Demokrasiyê ya Gelan (DEM Partî) Rêxistinên navçeya Wêranşar a Rihayê, ji bo Rojnameger Cîhan Bîlgîn û Nazim Daştan, li ber rêxistina navçeyê daxuyaniya çapemeniyê da. Hevşaredara Wêranşarê Bedriye Yorgun, Dayikên Aştiyê û gelek kes beşdarî daxuyaniyê bûn. Di daxuyaniyê de ku wêneyên Cîhan Bîlgîn û Nazim Daştan û pankarta “Çapemeniya azad nayê bêdengkirin” hat hilgirtin, daxuyaniya çapemeniyê ji aliyê Hevserokê DEM Partiyê yê Navçeya Wêranşarê Ramazan Diril ve hat xwendin.
Di daxuyaniyê de hat diyarkirin ku qetilkirina rojnameger Cîhan Bîlgîn û Nazîm Daştan nîşaneya dijminatiya li hemberî gelê kurd, jin û zarokan e û wiha hat gotin: “Çapemeniya azad a ku di bin şert û mercên herî dijwar de dixwaze rastiyan ji raya giştî re ragihîne, li hemû cîhanê hewldaneke cidî dide. Ji ber vê yekê gelek rojnameger hatin qetilkirin û girtin. Tevî van zext û çewisandinan jî têkoşîna çapemeniya azad mezin bûye û wê mezin bibe. Nazim û Cîhan her tim bûne dengê heqîqetê û Rojava.”
Daxuyanî bi dirûşma “Çapemeniya azad nayê bêdengkirin” û tilîliyan bi dawî bû.
