Baroyên Amed û Wanê ji ber ku ATKê agahiya “mînakên DNAyê di kîjan cihên laşê cenazeyê Rojîn Kabaîş de hatine dîtin” aşkera nekiriye giliyê ATKê kirin.
Rojîn Kabaîş a 21 salî ku xwendekara Beşa Mamostetiya Pêşdibistanê ya Zanîngeha Yuzuncu Yilê ya Wanê bû, di 27ê îlona 2024an de ji wargeha lê dima derket û cenazeyê wê piştî 18 rojan di Gola Wanê de hat dîtin. Piştî bûyerê derbarê windabûn û mirina biguman a Rojîn Kabaîş de lêpirsîn hat destpêkirin û Saziya Tip a Edlî (ATK) ku cenazeyê Kabaîşê lêkolîn kiribû, raporek amade kir. Di raporê de hat destnîşan kirin ku çend nimûneyên DNAyê li ser laşê Kabaîş hatiye dîtin, lê belê tevî hemû serlêdanan jî ATKê aşkera nekir ku ka ev DNA di kîjan herêmên Kabaîşê de hatiye dîtin.
‘Îhmalkariyên cidî hene’
Li ser vê yekê Baroyên Amed û Wanê di hesabên xwe yên medyaya dîjîtal de ragihandin ku di meşandina lêpirsîna ATKê ya derbarê Rojîn Kabaîş de gelek îhmal hene û wan giliyê ATKê kiriye. Daxuyaniya baroyan wiha ye: “Weke Baroya Wan û Amedê, em dixwazin raya giştî agahdar bikin ku di prosedurên ku ji hêla Saziya Tip a Edlî ve di lêpirsîna mirina gumanbar a Rojin Kabaîş de hatine kirin de îhmalkariyên cidî hene.
Tevî nameyên fermî ji Saziya Tip a Edlî re jî, agahiyên krîtîk ên derbarê cihên ku nimûneyên DNA ji cenazeyê Rojin Kabaîş hatine girtin, nehatine eşkerekirin an jî ji dosyaya dozê re nehatine şandin. Ev kêmasî ne tenê rasterast bandor li lêpirsînê kiriye, lê di heman demê de astengiya edaletê jî bandor kiriye.
Her çiqas Saziya Tip a Edlî saziyeke ku divê bêalî û li ser prensîbên zanistî bixebite be jî, bi hiştina raporên netemam û bêbersiv, hem rê li ber eşkerekirina rastiyê û hem jî rê li ber lêpirsîneke bi bandor girt. Ji ber vê yekê, li gorî maddeyên 257 (xerabkariya wezîfeyê) û 281 (veşartina delîlan) yên Qanûna Cezayê ya Tirkiyeyê, ji aliyê me ve li dijî rayedarên peywendîdar gilî hatiye kirin.”
