Saziyên Zimanê Kurdî û Platforma Saziyên Demokratîk, dê di 15 û 16ê Cotmehê de “Komxebata Stratejî û Polîtîkayên Têkoşîna Ji Bo Zimanê Kurdî” li dar bixe. Endamê Komîteya Amadekar a Komxebatê Heval Dilbihar diyar kir ku zimanê Kurdî hê jî tê astengkirin û qedexekirin û got: “Divê baş bê zanîn ku bêyî azadiya zimanê Kurdî, perwerdehiya Kurdî û statuya Kurdî aştiyeke rast û civakeke demokratîk nikare bê sazkirin.”
Saziyên Zimanê Kurdî û Platforma Saziyên Demokratîk, têkildarî “Komxebata Stratejî û Polîtîkayên Têkoşîna Ji Bo Zimanê Kurdî” ku dê di 15 û 16ê Cotmehê de li Eywana Dawetê ya Çiragan a li navçeya Rêya Armûşê ya Wanê li dar bixe, li baxçeyê DEM Partiyê daxuyanî da. Di daxuyaniyê de pankarta “Statuya Kurdî perwerdehiya bi Kurdî” hat daliqandin. Hevşaredarê Bajarê Mezin ê Wanê Abdullah Zeydan, nûnerên saziyên demokratîk, rêveberên DEM Partî û DBPê û gelek kes tev li daxuyaniyê bûn.
‘Banga Aştî û Civaka Demokratîk di rojeva gel de ye’
Li ser navê Komîteya Amadekar a Komxebatê Heval Dilbihar daxuyanî da û diyar kir ku pêvajoya “Aştî û Civaka Demokratîk” a ku Rêberê Gelê Kurd Abdullah Ocalan daye destpêkirin, di rojeva gelê Kurd de ye. Heval Dilbihar da zanîn ku bingeha aştiyê bi naskirina hemû mafên hemû neteweyan, kom û gelan e û got: “Li ser vê bingehê ji bo ku aştiyeke baş û civakeke demokratîk pêk bê, berî her tiştî divê hemû nirxên neteweya Kurd bên nasîn. Yek ji van nirxê herî bingehîn zimanê Kurdî ye. Zimanê Kurdî hêj jî, ji gelek aliyan ve di nava dorpêçekê de ye û rastî qedexe û êrîşan tê. Zimanê Kurdî hê jî di zagonan de serberst û azad nîn e, bêstatû ye û perwerdehiya bi Kurdî nîne. Divê baş bê zanîn ku bêyî azadiya zimanê Kurdî, perwerdehiya Kurdî û statûya Kurdî aştiyeke rast û civakeke demokratîk nikare bê sazkirin.”
‘Bingeha komxebatê diyarkirina stratejî û polîtîkayên têkoşîna ji bo Kurdî ye’
Heval Dilbihar gotina Rêberê Gelê Kurd Abdullah Ocalan ya “Zimanê dayikê ji bo neteweyekê ji nan û avê girîngtir e” bi bîr xist û ev yek anîn ziman: “Ji ber vê yekê divê hemû astengiyên li ser zimanê Kurdî bên rakirin û Kurdî di makezagonê de serbest be. Divê statûya zimanê Kurdî û perwerdehiya zimanê Kurdî bê qebûlkirin. Divê zimanê Kurdî hertim di rojeva gelê Kurd de be û divê gelê Kurd li gel hemû pêkhateyên xwe zimanê Kurdî weke mijareke stratejîk di rojeva xwe de bigire. Lewma divê stratejî, polîtîka û karnameyên ji bo zimanê Kurdî were amadekirin û têkoşîna ziman li her derî were bilindkirin. Li ser vê bingehê em weke saziyên zimanê kurdî û hemû sazî û dezgehên demokratîk 15 û 16ê mehê komxebatekê li dar dixin. Bingeha vê komxebatê diyarkirina stratejî û polîtîkayên têkoşîna ji bo Kurdî ye û hemû sazî û komeleyên welatparêz ên Kurdan dê stratejî û polîtîkayên xwe yên ji bo zimanê Kurdî diyar bikin. Ev komxebat dê bi beşdarbûna gelek derdoran pêk bê û ev çend meh in amadehiya vê komxebatê tê kirin. Her wiha gel jî bi awayekî çalak dê tev li komxebatê bibe. Em bang li hemû gelê xwe, sazî û dezgehên demokratîk ên welatparêz dikin ku vê çarşem û pênçşemê li Eywana Dawetê ya Çiraganê em bên cem hev.”
Daxuyanî bi dirûşmeyên “Bê Kurdî jiyan nabe” û “Zimanê me hebûna me ye” bi dawî bû.
