Ramazan Demîr ê ku piştî 30 salan ji zindanê tehliye bû li Amedê bi girseyî hate pêşwazîkirin. Ramazan Demîr got: “Parçeyekî me di zindanê de ye. Têkoşîn dîsa jî didome.”
Girtî Ramazan Demîr di Cotmeha 1994an de ji aliyê Dadgeha Ewlehiyê ya Dewletê (DGM) ve hatibû girtin. Piştî hat girtin bi îdiaya “endamtiya rêxistinê” hat darizandin û cezayê muebedê lê hatibû birîn. Demîr di girtîgehên weke Amed, Ordu, Meletî û herî dawî jî li girtîgeha Tîpa Tyê ya Amedê de piştî 30 salan hate berdan. Ramazan Demîr ku ji girtîgehê hate tehliyekirin, li pêşiya avahiya Komeleya Hevgirtinê ya bi Malbatên Girtî û Hikûmxwaran re (TUAY-DER) ya Amedê hat pêşwazîkirin. Di pêşwaziyê de Dayîkên Aştiyê, rêveberên rêxistinên sivîl û gelek kes amade bûn. Di merasîma pêşwaziyê de dirûşmeya “Bijî berxwedana zindanan” hate berzkirin.
‘Parçeyekî me di zindanê de ye’
Ramazan Demîr piştî berdanê hestê xwe yê pêşî anî ziman û got: “30 sal in me gelek bedelên giran dan. Em dizanin ku doza me, vala neçûye. Gelek hevalên me hene 30 salên xwe tije kirin e, lê dîsa jî nayên berdan. Hê jî serokatiya me di zindanê de ye. Parçeyekî me di zindanê de ye. Têkoşîna me dîsa jî didome. Em hêvîdarin keda me daye bigihîje serkeftin û azadiyê.”
