Xwediyê Weşanxaneya Aramê Hakki Boltan derbarê pêşangeha pirtêkan a Amedê de diyar kir ku bi hezara pirtûkên Kurdî niha li fuarê hene û wiha axivî: “Armanca hemû weşanxaneyên Kurdî ew e ku xizmeta çand û zimanê Kurdî bikin. Divê gelê Kurd piştgiriyê bide weşanxaneyan û xwedî li wan derkevin.”
9emîn Pêşengeha Pirtûkan a Amedê li Navenda Kongre û Fûarî ya Mezopotamyayî ya Navneteweyî hatiye destpêkirin, di roja çaran de bi eleqeyeke mezin berdewam dike. Li pêşengeha pirtûkan gelek weşangeh cihê xwe girtin. Yek ji wan jî Weşanxaneya Aramê ye. Di fuarê de gel bêhtir eleqeyê nîşanî weşanên Aramê dide. Xwediyê Weşanxaneya Aramê Hakki Boltan diyar kir li gorî salên berê îsal firotina pirtûkan gelek başe û wiha got: “Fûar dawiya heftê de destpê kir û baş destpê kir. Di nava hefteyê de çûn û hatin bi awayekî xwezayî hinekî kêm bû. Ji ber ku zarok û ciwan diçin dibistan û zanîngehê, xebatkat diçin kar lê dîsa jî tevli bûn başe. Lê dîsa jî eleqeyek baş ji bo pirtûkan heye.”
‘Armanca weşanxaneyan xizmeta zimanê Kurdî ye’
Boltan axaftina xwe wiha domand: “Fuar cihê pêşketin, şahiya pirtûkane û taybetî jî cihê çand û pirtûkên Kurdî ye. 9emîn Pêşengeha pirtûkan a Amedê ya ku TUYAPê amadekiriye 31 yek weşanxaneyên Kurdî tevlî bûne. Armanca hemû weşanxaneyên Kurdî ew e ku xizmeta çand û zimanê Kurdî bikin. Her demê li ser zimanê Kurdî zext hene, divê gelê Kurd piştgiriyê bide weşanxaneyan û xwedî li wan derkevin. Bi hezara pirtûkên Kurdî niha li fuarê hene taybetî Weşanxaneya Aramê îsal 36 pirtûkên nû derxistin. Tevahî li ser standa me pirtûkên 200 nivîskaran heye. Em dixwazin bi van pirtûkan xizmeta gelê xwe bikin. Niha 13 pirtûkên Kurdî hene û em dixwazin hejmara wan zêde bibe. Li gorî salên berê eleqeyek zêde ji bo pirtûkan heye. Ev jî nîşan dide ku xwendina pirtûkan li gorî salê berê zêde bûye.
