Li Efrînê êrişên talankirina xwezayê bi destê çeteyên girêdayî Tirkiyeyê berdewam dike. Tirkiye li aliyekê dixwaze hêza kurdan belav bike û li aliyê din çeteyên êrişî kurdan û xwezaya wan dike, diparêze.
Li Sûriyê êrişên çeteyên girêdayî Hikûmeta Demkî ya Şamê û komên girêdayî Tirkiyeyê didomin. Di demek Tirkiye û Şam dixwazin hêzên Rêveberiya Bakur û Rojhilatê Sûriyeyê belav bikin de êrişên li dijî gel û talana xwezayê didomin. Nûçegihanê North Pressê Sîwar Hamo xwe gihand dîmenên nû yên talana xwezayê. Di nûçeyê de dîmen û agahiyên derbarê talana li dijî xwezayê hatin weşandin. Li gorî nûçeyê dîmen duh ji gundekê Êzidiyan ê bi navê Baflûnê hatin kişandin. Niştecihên herêmê diyar dikin ku di 12ê Kanûnê de komên çete yên bi ser Tirkiyeyê ve hatine herêmê û 45 darên qaçê-sedîr ên ku kêm peyda dibin, birîne û li wesayîtan barkirine û birine.
‘Li Efrînê cihê dawî yê bi dar mayî ye’
Gundiyan ji North Press re gotin ku derên hatine birîn bi wesayîtan ber bi Ezazê ve hatine birin. Niştecihan gotin ku wan hewl da rê li ber birîna daran bigirin lê nekarîne pêşiyê li çeteyan bigirin. “Ev dever li Afrînê cihê dawî yê mayî bû ku darên sedarê lê hebûn. Tiştê ku qewimî ne tenê dizîna daran e lê belê wêrankirina mîraseke xwezayî ye.”
Çeteyên Tirkiyeyê guh nadin hişyariyan
Di nûçeyê de hate daxuyandin ku tevî bangên dubare yên rêxistinên herêmî û navneteweyî jî çeteyên Tirkiyeyê guhdar nakin û ev yek jî dibe sedema berdewakirina talan xwezaya Efrînê. Efrîn ku di sala 2018’an de ji hêla Tirkiyeyê ve hate dagirkirin heta niha bi tevkujiya etnîkî ya gelê kurd û talana xwezayê tê rojevê.
Tirkiye dest ji dagirkeriyê bernade
Ligel ku hate daxuyandin ku ev komên çete tev li Artêşa Sûriyê ya Nû bûne jî ev yek li ser kaxizê maye. Çavkaniyên herêmî dibêjin ku Tirkiye van koman wekî xweser dihêle û bi riya wan paqijiya nijadî ya li hemberî kurdan didomîne.
