Sernivîskarê Rojnameya El-Ahbarê Amîr Alî diyar kir ku êrîşa Palmirayê polîtîkaya nû ya Amerîkayê li holê hiştiye û wiha got: “Ev êrîşa bi destê endamê HTŞê pêk hatî danî holê ku nîvekarê herî pêbawer Hêzên Sûriyeya Demokratîk in. Amîr Alî destnîşan dike ku pêkhatina vê bûyerê polîtîkaya Amerîkayê ya bi Hikûmeta Demkî re ji binî ve hejandiye.
Nîqaşên derbarê êrîşa di 13ê Kanûnê de li Palmiraya Sûriyeyê pêkhatî û bandora wê ya li ser têkiliyên Amerîka û Hikûmeta Demkî ya Sûriyeyê berdewam dikin. Piştî çapemeniya Amerîkayê, çapemeniya Ereban jî li ser vê mijarê nûçe û dahurandin weşandin. Sernivîskarê Rojnameya El-Ahbarê Amîr Alî îro li ser vê mijarê nivîsand û balkişand ser xeteriyên polîtîkaya nû ya Amerîkayê. Di nivîsê de hate bi bîrxistin ku kesê êrîş kirî endamekî HTŞê bûye û ev nirxandin hatin kirin: “Êrîşê qelsiyên ewlehiyê yên polîtîkaya Washingtonê û hebûna DAÎŞê raxist ber çavan. Vê bûyerê polîtîkaya Amerîkayê ya bi Hikûmeta Demkî re ji binî ve hejandiye. Her wiha pêvajoya rakirina pêdankirinan jî xistiye talûkeyê. Car din bûyerê nîşan da ku hêza herî pêbawer li Sûriyeyê HSD ye.”
‘Êrîşê qelsiyên ewlehiyê yên polîtîkaya Washingtonê raxist ber çavan’
Amîr Alî tîne ziman ku îhtimala êrîşeke wiha ji bo DYAyê dûr nebû û lê Washingtonê ligel vê rîskê xwest van rastiyan binixumîne. Alî ev dahurandin kirin: “Bes derkete holê ku DYA nîvekarên Hevpeymana Navneteweyî jî di vî warî de îkna nekirine û vê bûyerê jî qeyranên mezin derxistin holê. Ji ber ku êrîş ne ji derve ji hundir ve hat. Tarık Sattuf el-Hamad endamek HTŞê bû. Ji xwe Wezîrê Wezîrê Karên Hundir ê rejîmê ev yek qebûl kir. Li di bûyerên li Sûweyda û Peravê de jî derket holê ku Hikûmeta Demkî lêpirsînen berfireh derbarê kesan de dimeşîne û wisa wezîfeyê dide. Ev meselek wisa ji ber çavan reviyayî nîne. Daxuyaniyên ji hêla rayedarên rejîmê ve hatine kirin jî bi armanca îdarekirina qeyrana derketî holê ye.”
‘Herêm di nav hizban de hatiye parvekirin’
Amîr Alî derbirî ku daxuyaniyên Amerîkayê derbarê bûyerê de hatîn jî gelek rastiyan datîne holê û wiha got: “Di daxuyaniyan de hate gotin ku herêm di bin bandora HTŞê de nîne. Ev yek nîşan dide ku herêm di navbera hizman de hatiye parvekirin. Ango li herêmê qeyranek mezin a asayîşê heye. Lê rastî wisa nîne. Hêzên li El Tanafê yên girêdayî Amerîkayê berî niha daxuyandibûn ku xwe fesih kirine û tev li Wezareta Karên Hundir a Sûriyê bûye. Ev daxuyaniyên Amerîkayê ji bo xilaskirina Ebu Muhammed el Golanî hatin kirin. Lê di heman demê de rastiya li ser erdê jî vegotin. Hikûmeta Demkî nikare kontrola li ser erdê ava bike. Ku rastiya HTŞ beşek ji El Qadîreyê ye jî li ber çavan bê girtin asta talûkeyê jî derdikeve holê.
‘Hêza pêbawer HSD ye’
Têkildarî mijarê Alî got ku rastiya herî girîng a vê êrîşê derxistî holê jî derbarê HSDê de ye û ev tişt gotin: “DYAyê bi Hikûmeta Demkî re di warê wezîfedarkirina leşkeran de gelek tedbîr pêş xistine. Hemû kesên heyî di lêgerîna ewlehiyê de derbas dikin. Lê derket holê ku tevahiya van pêk hatiyên HTŞ û OSOyê tevahî di aliyê hişmendî de heman in. Vê êrîşê nîşan da ku hêza herî pêbawer ji bo Washingtonê HSD ye. Piştî têkiliyên bi HTŞê re gelek nirxandinên wekî dê têkiliyên DYA û HSD qels bibin hebû. Lê xuya ye rewş dê ji nûve bê nirxandin û guherîna polîtîkayên Washingtonê yên heyî mecbûrî ye.” Alî bi bîr xist ku DYAyê destnîşan kiriye ku piştî êrîşê li Palmîra operasyon daye destpêkirin û herê ji DAÎŞê paqij kiriye. Alî anî ziman ku ev yek ne pêkan e û ji ber ku DAÎŞê nifûzê hemû hêzên tundiraw ên li Sûriyê kiriye û xwedî torek berfireh e.
