Piştî Trump pêdankirinên li ser Sûriyê rakirin 144 nûnerên partiya wî bi daxuyaniyekê hişyarî dan Ahmet eş-Şara û daxuyandin ku mafên Xiristiyan, Durzî, Elewî, Kurd û kêmarên din ên olî û etknîkî neyên dayîn dê pêdankirinan cardin bixin meriyetê.
Serokê DYAyê Donald Trump hefteya borî pêdankirinên bi navê CAATSA ji ser Sûriyeyê rakirin û diyar kir ku dê şansekê bidin Sûriyê. Bes bêbawerî û nerazîbûnên li hemberî polîtîkayên Trump jî berdewam dikin. 144 parlementerên partiya Trump bi daxuyaniyekê hişyarî dan Trump û Sûriyeyê. Di daxuyaniyê de hate diyarkirin ku rakirina pêdankirinan ji bo Sûriyeyê şansekî mezin û hate xwestin ku Ahmet eş-Şara vî şansî baş bikar bîne.
Mafên Kurd, Durzî, Elewî û Xiristiyanan girîng in
Di daxuyaniyê de qeyran, êrîş û binpêkirinên mafên komên etnîk û olî hate bibîrxistin û wiha hate gotin: “Divê kuştinên komî yên Xiristiyan, Durzî, Elewî, Kurd û kêmarên din ên olî û etnîkî pêk neyên û ji bo vê gavên pêwist bên avêtin. Kongre dê Hikûmeta Nû ya Sûriyeyê ji nêz ve bişopîne ku mafên kêmarên olî û etnîkî diparêz e û vê yekê misoger bike.”
Kongre dê ji bo şopandinê biçe Şamê
Di daxuyaniyê de hate ragihandin ku Kongre ji bo di cih de şopandina mijarê di demên pêş de komîsyonek bişîne Şamê û wiha hate gotin: “Pêdankirin bi şert hatin rakirin. Kongre dê lê binêre ka Ahmet eş-Şara çiqas ev şert bi cih anîne. Ku Kongre tespît bike şert nehatine bi cih anîn dê pêdankirin cardin ji nûve bikevin meriyetê. Ne tenê ji aliye Şara ve lê di heman demê de ji aliyê hemû saziyên Hikûmeta Demkî ve jî divê bi taybetî helwesta li hemberî kêmarên olî yên li Sûweydayê bê guherîn.
Kongre dê nûnerên kêmaran guhdar bike
Her wiha di daxuyaniyê de zordariya li hemberî kêmarên olî û etnîkî de jî hate bi bîr xistin û ev xal hatin destnîşankirin: “Divê ji bo hemû kêmaran hawirek bi ewle bê avakirin. Gavên di vî alî de bên avêtin ji bo aştiyek mayînde li Rojhilata Navîn gelek girîng in. Komîteya Karûbarên Derve ya Encûmenê, bi serokatiya Serokê Encûmenê Johnson û Serokê Komîteyê Mast de dê di sala 2026an de rûniştineke guhdarîkirinê li dar bixe û pêşketinên derbarê komên etnîk û olî de tespît bike. Ku guherîn çê nebibe dê pêdankirin paşde bên.”
