MED-TUHAD-FEDê têkildarî mitînga “Hêvî û Azadiyê” li avahiya xwe ya li Amedê daxuyanî da. Hevserok Kerem Canpolat got: “Divê teqez Abdullah Ocalan bigihêje azadiya xwe ya fizîkî.”
Federasyona Komaleyên Hiqûq û Piştevaniyê ya Malbatên Girtî û Hukumxwaran a Medê (MED TUHAD-FED) li avahiya xwe ya li navçeya Bajarê Nû ya Amedê têkildarî mitînga “Hêvî û Azadiyê” ya 4ê Çileyê ya ku dê li Qada Îstasyonê bê li darxistin daxuyanî da çapemeniyê. Malbatên girtiyan, endam û hevserokên MED TUHAD-FÊDê di daxuyaniya çapemeniyê de cîh girtin.
‘Dewletê hêj gaveke şênber neavêtiye’
Hevserokê MED-TUHAD-FEDê Kerem Canpolat diyarkir ku di pêvajoya Aştî û Civaka Demokratîk de PKKê gavên şênber avêtin û axaftina xwe wiha domand: “Wek hûn dizanin ev salek 3ê meh in ku pêvajoyeke aştî û çareseriyê ji bo pirsgirêka Gelê Kurd, wekî mafê mirovahiyê çareser bibe pêvajoyeke aştiyê destpêkiriye. Ji bo vê pêvajoyê PKKê xwe fesixkir, çekên xwe şewitandin, hêzên xwe vekişandin ji bo ku dewlet gavên şênber bavêje. Mixabin dewletê hêj gaveke şênber neavêtiye. Ev pêvajo, pêvajoya li hember mirinê jiyanê diparêze, ev pêvajo ji bo zarokên Kurdan yên di girtîgehan de, yên ku li serê çiyane ji bo ku dayik bigihîjin zarokê xwe hatiye destpêkirin.”
‘Divê teqez Rêberê Gelê Kurd bigihîje azadiya xwe ya fizîkî’
Kerem Canpolat bal kişand li ser “Mafê Hêviyê” û ev tişt gotin: “Li dinyayê gelek dewletan mafê mirovahiyê, wekî Mafê Hêviyê anîne cîh. Birêz Abdullah Ocalan Muzakerevanê vê pêvajoyê ye, mîmarê vê pêvajoyê ye. Ev pêvajo bi banga wî hate destpêkirin û pêvajo bi wî re dimeşe. Em dibêjin bila birêz Abdullah Ocalan bi teqez bigihîje azadiya xwe ya fîzikî û hemû girtiyên me bila bigihîjin azadiya xwe. Em dixwazin Mafê hêviyê pêk were.”
‘Bila gelê me bi sed hezaran bê mitîngê’
Di dawiya axaftina xwe de Kerem Canpolat gel vexwend mitînga “Hêvî û Azadiyê û axaftina xwe de wiha got: “4ê Çilê bila bi sed hezaran tevlî mitînga “Hêvî û Azadiyê” bibin. Ji bo gelê Kurd dîsa hestiyên xwe negerin, ji bo aştiyeke mayinde bikeve merhelê divê em bi sed hezaran bicivin. Em dixwazin Qada Îstasyonê bile qada aştiye ku bila dewlet neçar bimîne û gavên şênber bavêje. Em dest bidin dest hev li qadê bin û piştgirî bidin pêvajoyê. Em hemû dayikên xwe, hemû malbatên xwe û tevahî gelê xwe vedixwînin qada Îstasyonê.”
