Li ser sînorên ku Kurdistanê dabeş kirine, trajediyek din qewimî. Kolberê kurd Husên Dewletxah, di encama êrîşa leşkerên dewleta Tirk de hat qetilkirin. Ev bûyer, birîna malbatekê ku berê jî kurekî xwe li ser sînor winda kiribû dîsa kuta kir.
Husên Dewletxah ku ji bo debara malbata xwe karê kolberiyê dikir, li herêma sînorî ya di navbera Maku û Wanê de bû hedefa leşkerên Tirk. Husên Dewletxah di encama gulebarana rasterast a leşkerên Tirkiyeyê de jiyana xwe ji dest da. Hat ragihandin ku berî gulebaranê tu hişyarî li Husen Dewletxah nehatiye kirin.
Malbata Dewletxah: Êşeke Dubare
Ya ku vê bûyerê hîn bi girantir dike ew e ku ev malbat ne cara ewil e ku bi vê êşê re rû bi rû dimîne. Li gorî agahiyan, birayê Husên Dewletxah, Wehîd Dewletxah jî beriya 3 salan li ser sînorê Rojhilatê Kurdistanê dema kolberî dikir ji aliyê Pasdarên Îranê ve hatiye kuştin. Malbata Dewletxah kurê wan ê yekem bi guleyên “Pasdaran”, kurê wan ê duyem jî bi guleyên “Leşkerên Tirk” hatin qetilkirin.
Siyaseta “Bêcezakirinê” rê li ber kuştinan vedike
Kuştina Husên Dewletxah careke din nîşan da ku li ser sînoran mafê jiyanê tune ye. Kolberên ku ji ber qeyrana aborî û nebûna derfetên kar, neçar dimînin barên giran di navbera sînoran de bikişînin, her roj dibin hedefa leşkerên dewletên Îran û Tirkiyeyê.
Saziyên mafên mirovan her tim balê dikşînin ser vê yekê ku li ser sînoran leşker li gorî kêfa xwe kolberan dikujin û tu lêpirsîn li dijî wan bûyeran nayên destpêkirin. Ev siyaseta “bêcezakirinê” dibe sedem ku her sal bi dehan kolberên mîna Husên Dewletxah û birayê wî Wehîd Dewletxah bibin qurbaniyên dewletan.
