Îlham Ehmed diyar kir ku êrişên li ser taxên Şêxmeqsûd û Eşrefiyê yên Helebê xeteriyek mezin li ser welat û herêmê çêkir û got Rêveberiya Xweser û hêzên wê bi vebijêrka diyalog û danûstandinê re ye.
Hevseroka Daîreya Têkiliyên Derve ya Rêveberiya Xweseriya Demokratîk Îlham Ehmed anî ziman ku bûyerên li Sûriyeyê xeteriyek mezin li ser welat û herêmê çêdikin û wê destwerdanên derve zêde bibin û dibe ku careke din terorê derxin derveyî Sûriyeyê.
Îlham di civîneke çapemeniyê de da zanîn ku hikÜmeta demkî berpirsa mezin a nepêkanîna peymana 10ê Adarê ye.
Li ser êrişên li Helebê, Îlham da zanîn ku ew êriş bi şerê ragihandinê ya li dijî van taxan re dest pê kir, çeteyên hikumeta demkî bi dirêjahiya çend mehên berê êrişî her du taxan dikirin, vê jî krîzek çêkir.
Di dewama axaftina xwe de Îlham Ehmed da zanîn ku “Wezareta Parastinê bi awayekî fermî operasyona leşkerî li dijî taxên Şêxmeqsûd û Eşrefiyê ragihandibû. HSDê li gorî peymana 1ê Nîsanê ji her du taxan vekişiyabû, lê hikumetê propoganda dikir ku HSDê li her du taxan heye. Ji lew re bi 80 tankî dest bi êrişeke tund kir.”
Îlhamê ragihand ku di êrişan de nêzî 48 kesan jiyana xwe ji dest da û 118 birîndar bûn û hîna çarenûsa bi dehan ne diyar e.
Îlhamê destnîşan kir ku çeteyên ku sûcên hovane li Helebê kirine ji DAIŞê, Îgor, komên Tirkiyeyê û çeteyên biyanî bûn. Van hemû çeteyan êrişî taxên Şêxmeqsûd û Eşrefiyê kirin.
Hevseroka Daîreya Têkiliyên Derve Îlham Ehmed got yek ji ji şertên rakirina cezayên Amerîkayê û biyanî li ser Sûriyeyê parastina pêkhateyan û dûrxistina biyaniyan bû, lê hikûmetê heta niha berovajî wê kiriye, êrişî elewiyan, durzî, xiristiyan kir, niha jî êrişî kurdan dike.
Îlham bang li hikumeta Amerîkayê kir ku helwesta xwe ji bo hikûmeta demkî ya ku komkujiyan li dijî kurdan pêk tîne zelal bike.
Di dawiyê de Îlham Ehmed got ew bi diyalog û danûstandinan re ne, lê şert e êriş werin rawestandin, Kurdên li Heleb û Efrînê werin parastin.
