Li Şemzînanê êrişên çeteyên girêdayî hikûmeta demkî ya Şamê û Tirkiyeyê meş hat lidarxistin û wiha hat gotin: “Hewl didin ku pêvajoyê bidin dawîkirin.”
Çeteyên girêdayî hikûmeta demkî ya Şamê û Tirkiyeyê êrişên xwe yên li dijî Bakur û Rojhilatê Sûriyeyê didomînin. Platforma Saziyên Demokratîk li Navçeya Şemzînan a Colemêrgê êrişên ser herêmên Kurdan bi meşekê şermezar kirin. Girse ji bo meşê li pêşiya avahiyê DEM Partiyê kom bû û ber bi Cadeya Cumhuriyetê ve bi dirûşmên “Bijî berxwedana Rojava”, “Bijî berxwedana QSD” ve “Bijî berxwedana gelê Kurd” meş li dar xist.
‘Sûcê mirovahiyê tê kirin’
Di daxuyaniyê de pankarta “Xwedî derketina Rojava xwedi derketina mirovahiyê ye” hate vekirin. Hevserokê DBPa Şemzînanê Senar Duyan daxuyanî xwend. Senar Dayan di daxuyaniyê de destnîşan kir ku di êrişan de sûcê mirovahiyê tê kirin û wiha got: “Bi zanebûn jîngeh tên hedefgirtin û ev yek bi zanebûn binpêkirina mafê jiyanê ye. Hikûmeta demkî ya Şamê bi xwe nikare çeteyên girêdayî xwe kontrol bike. Êrişên ser Rojavayê, bombebarana herêmên sivîlan, bi zorê ji warên xwe dûrxistina mirovan derveyî hikûka navneteweyî û peymanên navneteweyî ye.”
‘Dixwazin pêvajo bi dawî bibe’
Parlamenterê DEM Partiyê yê Colemêrgê Vezîr Coşkun Parlak jî derbarê mijarê de ev tişt gotin: “Êrişên li dijî Rojava dest pê kirine lê belê çeteyên Tirkiyeyê û yên girêdayî Tirkiyeyê bila zanibin ku Rojava nakeve. Zarok û pîrên me kuştin. Ew zarokên me bûn. Em van polîtîkayan şermezar dikin.
‘Ya piştgirî dide êrişan AKP ye’
Vezîr Coşkûn Parlak da zanîn ku bi êriş bi hewldana dawîkirina pêvajoya Rêberê Gelê Kurd Abdullah Ocalan tên kirin û wiha got: “Berxwedana li Kobanê îro liv ê derê berdewam dike. Em van êrişan şermezar dikin. Em neviyên Şêx Saîd û Seyîd Riza ne. Li 4 perçeyên Kurdistanê şer hatiye îlankirin. Bila ev yek neyê ji bîr kirin. Ya ku piştgiriyê dide van çeteyan AKP ye.”
