Mêrdîn – Welatiyên ku li dijî êrişên li ser Rojava duh beri sînorê di navbera Nisêbîn û Qamişloyê de herikîn bang li hemû gelê Kurd kirin ku xwedî li Rojava derkevin û gotin “Heta dilopa xwîna xwe ya dawî em ê li ber xwe bidin.”
Li Nisêbînê duh bi pêşengiya Platforma Saziyên Demokratîk siyasetmedarên Kurd jî di nav de bi hezaran kes li navenda navçeyê kom bûn û bi meşeke girseyî ber bi sînorê Nisêbîn û Qamişloyê ve meşiyan. Di meşê de bênavber dirûşmên “Bijî berxwedana Rojava” û “Rojava rûmeta me ye” hatin berzkirin. Welatiyên ku têkildarî êrişên li ser Rojava û Bakur û Rojhilatê Sûriyeyê ji ajansa me re axivîn bang li hemû gelên cîhanê kirin ku xwedî li Rojava derkevin.
Welatiyan diyar kirin ku heke Kurd bibin yek dikarin pêşiyê li şer bigirin û anîn ziman ku “Roj roja xîretê ye.” Welatiyan xwest ku gelê Kurd li her derê rabin ser pêyan û destnîşan kirin ku heta dilopeke xwîna wan hebe dê li ber xwe bidin. Welatiyan bang li gelê Bakur kir ku berê xwe bidin Rojava û destkeftiyên Rojava biparêzin. Welatiyan diyar kirin ku ji ber Kurd in êriş li wan tê kirin û destnîşan kir ku heta yek kes bimîne dê doza xwe biparêzin.
