Li paytexta Ermenistanê Êrîvanê, Kurdistanî û gelê Ermenî li dijî êrîşên li ser Rojavayê Kurdistanê meşiyan û hevgirtina xwe ya bi Rojava re anîn ziman.
Li paytexta Ermenistanê Êrîvanê, li dijî êrîşên çeteyên DAÎŞ û HTŞê yên li ser Rojavayê Kurdistanê meşek girseyî hate li dar xistin. Meşa ku li Qada Haraparagê dest pê kir, heta ber avahiya Neteweyên Yekbûyî dewam kir. Parlamenter Kinyaz Hemîd û Hevserokê Komîteya Kurdistanê Silo Dirboyan di mîtîngê de axavîn. Her wiha, peyama ku ji bo radestkirina Neteweyên Yekbûyî hatibû amadekirin ji hêla rojnamevan Lianna Mihoyan ve hate xwendin.
‘Rojava xeta sor e’
Di axaftinan de hate destnîşankirin ku êrîşên li ser Rojava komployek li dijî gelê Kurd e. Hat bibîrxistin ku gelê Kurd 14 sal in li dijî DAÎŞê şer dike û ji bo parastina mirovahiyê ji xetereyek mezin, bedelên giran daye. Di daxuyaniyê de her wiha hate gotin ku Rojava ji bo gelê Kurd xeta sor e û Kurdên li Ermenistanê dê heta dawiyê piştgiriyê bidin berxwedana gelê Rojava.
Meş bi bangek ji bo Neteweyên Yekbûyî ku tê de hate xwestin ku civaka navneteweyî bêdeng nemîne û berpirsiyariya xwe ya mirovî bicîh bîne, bi dawî bû. Çalakî bi dirûşmeyên “Bijî berxwedana Rojava” û “Bijî Serok Apo” bi dawî bû.
