Hêzên Sûriyeya Demokratîk (HSD) ragihand ku bi Hikûmeta Demkî ya Sûriyeyê re peymanek li ser entegrasyona bi qedeme ya hêzên îdarî û leşkerî hatiye îmzekirin.
Di daxuyaniya Navenda Ragihandinê ya HSDê de hate gotin, “Di navbera Hikumeta Sûriyeyê û Hêzên Sûriyeya Demokratîk (HSD) de di çarçoveya peymaneke berfireh a li ser entegrasyona bi qedeme ya hêzên îdarî û leşkerî yê aliyan de peymanek hate îmzekirin.”
Hûrgiliyên peymana di navbera HSDê û Şamê de hatiye îmzekirin bi vî rengî ye:
“Ev peyman hikum dide ku hêzên leşkerî xwe ji nuqteyên şer vekişînin, hêzên ewlekariyê yên ser bi Wezareta Karên Hundir li navenda bajarên Hesekê û Qamişloyê bêne bicihkirin, pêvajoya entegrasyona hêzên ewlekariyê li herêmê bê destpêkirin, di bin sîwana tumenekê de ya ku bi erka Walîtiya Helebê bê avakirin tumeneke leşkerî bê damezrandin ku ji 3 tûgayên ser bi HSDê ve û ji Kobanê jî tûgayekê pêk bê.
Peyman her wiha destnîşan dike ku saziyên Rêveberiya Xweser di bin sîwana saziyên Dewleta Sûriyeyê de bên entegrekirin û personelên wê yên erkdar bibin kadro.
Li gel vê yekê, peyman mafên perwerde û sivîl ên gelê Kurd garantî dike û vegera kesên ji cih û warê xwe bûne ji xwe re dike armanc.
Armanc ji vê peymanê ew e ku hevkariya navbera aliyên pêwendîdar xurt bike, hewldanên ji bo jinûve avakirina welêt bike yek, yekîtiya xaka Sûriyeyê pêk bîne û li herêmê entegrasyonekê pêk bîne.”
