Li gelek navçe û bajarên Bakurê Kurdistanê bi pêşengiya Platforma Saziyên Demokratîk bi boneya 1ê Sibatê Roja Piştevaniya bi Rojava re ya Cîhanê daxuyanî hatin dayîn û di daxuyaniyan de hate gotin ku gelê Kurd heta hetayê li bi Rojava re ye û dê destkeftiyên Rojava biparêzin.
Bi pêşengiya Platforma Saziyên Demokratîk bi boneya 1ê Sibatê Roja Piştevaniya Bi Rojava Re ya Cîhanê li gelek navçe û bajaran daxuyanî hatin dayîn.
Colemêrg
Platforma Saziyên Demokratîk li navçeya Şemzînan a Colemêrgê bi boneya 1ê Sibatê Roja Piştevaniya bi Rojava re ya Cîhanê daxuyanî da. Daxuyanî li pêşiya avahiya DEM Partiyê hate dayîn û gelek kes tev li bûn. Hevserokê DEM Partiyê yê Colemêrgê Egîd Tekîn daxuyaniya hevpar a ku îro li gelek navendan tê dayîn xwend.
Parlamenterê DEM Partiyê yê Colemêrgê Vezîr Coşkun Parlak axivî û got: “Îro rojeke gelek watedar e. Her sal bi boneya vê rojê em ê li hev kom bibin. Em ê 1ê Sibatê Roja Piştevaniya bi Rojava re ya Cîhanê di rojevê de bihêlin.
Daxuyanî bi berzkirina dirûşma “Bijî berxwedana Rojava” bi dawî bû.
Wan
Platforma Saziyên Demokratîk li Wanê bi boneya Roja Hevgirtina Bi Rojava re ya Cîhanê li ber Wan Mall AVMê daxuyaniyek da. Di daxuyaniyê de pankarta “Em bi ruhê yekitiya neteweyî ya demokratîk 1ê Sibatê Roja Piştevaniya Rojava ya Cîhanê silav dikin” hat vekirin û dirûşmên “Bijî berxwedana Rojava”, “Yek e yek e yek e gelê Kurd yek e” û “Rojava rûmeta me ye” hatin berzkirin. Hevserokên DBP û DEM Partiyê yên Wanê, parlementerên DEM Partiyê yên Wanê Gulderen Varli û Zulkuf Ûçar, hevşaredara Bajarê Mezin a Wanê Neslîhan Şedal, Dayikên Aştiyê, aktivîstên TJAyê, Meclîsa DEM Partiyê û DBPê ya Ciwanan, nûnerên saziyên sivîl û gelek welatî tev li daxuyaniyê bûn. Hevserokê DBPê yê Wanê Cemal Demîr metna hevpar a bi Kurmancî xwend.
Piştre parlamentera DEM Partiyê Gulderen Varli axivî û bal kişand ser parastina Rojava. Gulderen Varli destnîşan kir ku divê cîhan û Tirkiye dest ji piştgiriya hişmendiya DAIŞê berdin û got: “Em weke gelê Kurd li çar parçeyan bûne yek û me got ‘yek e yek e yek e gelê Kurd yek e’. Em dê li hemberî hemû jenosîdan weke gelê Kurd rawestin û qebûl nakin. Em weke jin, ciwan û zarokan li hemû qadan li gel têkoşîna gelê xwe yê Rojava ne. Heta ku hûn digehijin statuya xwe em ê li gel we bin û tu carî jî paş ve gav naavêjin. Heta ku aramiya wir neyê tesîskirin em ê li her derê dirûşmên ‘Rojava rûmeta me ye’ û ‘Bijî berxwedana Rojava’ berz bikin.”
Daxuyanî bi berzkirina dirûşman bi dawî bû.
Êlih
Li Êlihê bi pêşengiya Platforma Saziyên Demokratîk bi wesîleya rojê li Parka Yilmaz Guney daxuyanî hate dayîn. Di daxuyaniyê de pankarta “Em bi ruhê yekîtiya neteweyî ya demokratik 1ê Sibatê Roja Piştevaniya bi Rojava re ya Cîhanê silav dikin” hate vekirin û bênavber dirûşmên wek, ““Bijî berxwedana Kobanê”, “Bîji berxwedana Rojava”, “Yek e, yek e, yek e gelê Kurd yek e”, “Rojava Rojhilat e Kurdistan yek welat e” hatin berzkirin. Hevseroka R3existina DBPê ya Êlihê Mehdiye Demîr daxuyaniya hevpar xwend.
Piştre Parlamenterê DEM Partiyê yê Êlihê Mehmet Ruştu Tiryakî axivî û êrişên li ser Rojava şermezar kir û got ku bi berxwedana Rojava re ruhê yekîtiya neteweyî derket holê. Tiryakî destnîşan kir ku Kurdan li şûna şer rêya diyalogê bijartiye.
Daxuyanî bi berzkirina dirûşman bi dawî bû.
Cizîr
Li navçeya Cizîra Şirnexê di çarçoveya 1ê Sibatê Rojava Piştgiriya Rojava ya Cîhanê ji aliyê Platforma Saziyên Demokratîk ve daxuyanî hate dayin. Girseyê ku xwest bimeşe ji aliyê polîsan ve hate astengkirin. Li dijî vê bi hezaran kes li qada taxê kombûn û daxuyanî dan çapemeniyê. Daxuyaniya ku li taxa Cudî hate dayîn Hevseroka Partiya Herêmên Demokratîk (DBP) Çîgdem Kiliçgûn Uçar, parlamenterê DEM Partiyê yê Şirnexê û bi deh hezaran kes tev li bûn.
Pêşiya daxuyaniyê girseya ku li qada taxê kom bû bi dirûşmeyên, “Bijî berxwedana rojava”, “Yek e, yek e gelê Kurd yek e” dil da Rojavayê Kurdistanê.
Di daxuyaniyê de bi pankarta, “Em bi ruhê yekîtiya neteweyî ya denokratîk 1ê Sibatê Roja Piştevaniya bi Rojava re ya Cîhanê silav dikin” hate vekirin.
Metna çapemeniyê ya hevpar ji aliyê Hevserokê DEM Partiya Cizîrê Yilmaz Sanri ve hate xwendin.
‘Em ê pêşengiya şoreşê bikin’
Piştre aktivîsta TJAyê Çîmen Adalet Fîdan axivî. Çîmen Adalet Fîdan, bal kişand li ser şandeya ku çûye Rojava û got:” Rojava slavên xwe yên gerim yê berxwedêr ji we re şandin. Beriya 10 salan hêzeke çetewarî DAIŞê êriş bir ser Rojava. Îradeya jina û Rojava DAIŞ binpêkir û nehişt ku Rojava bikeve. Xewn û xeyalên me li Rojava pêk hat. Lê dîsa êriş bitin ser Rojava. Hedef girtina rojava hedef girtina azadiya jinê yekitiya gelab bû. Li dijî van êrişan herkesê ku nirxên mirovahiyê parastin derketin qadan û piştevaniya Rojava kirin. Gelê kurd bû yek û li dijî van êrişan dengê xwe bilind kir. Me çawa ku piştevaniya Rojava kir û bedelên giran dan em dîsa piştevaniya Rojava bikîn û pêşengiya vê şoreşê dikîn.”
Kiliçgun: Netew-dewlet têk çû û vîna gel bi ser ket
Piştre hevseroka DBPê ya Giştî Çîgdem Kilicgûn Uçar axivî. Çîgdem Kilicgûn Uçar bi lêv kir ku parastina rojava parastina nirxên mirovahiyê ye û got ku bi saya têkoşîna gelan netew dewlet careke din têk çû û wiha axivî:” Têkoşîna gelê me encam girt ev serkeftin li gelê me pîroz be. Gelê me êrişên ser Rojava qebûl nake. Amed dimeşe, Stenbol dimeşe, Bazîd dimeşe lê Cizîr nameşe. Çima? Ji ber ku ew kesên Rojava li vir in. Hûn ê li dijî îradeya ciwanan, jinan binpê bikin. Coşa gel ya vê derê ji bo ku zarok nemirin, jin nemirine. Ji yekitiya grlê kurd aciz bûne, aciz nebin. Gelê kurd dê li dijî DAIŞê bimeşe, dê ji bo azadiya xwe û tifaqiya xwe bimeşe. Rojava pergala yekitiya gelane. Ew lihrvhatina 30ê Berfanbarê derketiye holê di encama têkoşîna gelê kurd de çêbû. Careke me dît ku netew dewlet nikarin li hemberî vîna gelan bisekine. Em slavên xwe kesên ku ji bo aşitiyê, azadiyê û yekitiya gelan şer dikin pêşkeş dikin. Kobanê kela azadiya gelane, kesên ku li Kobanê ceyranê dibirin, avê dibirin dê nikaribin berxwedana jinan û ciwanan bidin sekinandin. Li dijî van êrişan Îradeyeke gelek mezin derket holê. Gel gav bi gav mezintir dibe. Vê yekê du tişt nîşanî me da ku netew dewlet têk çû û vîna gelan bi ser ket. Heta ku agirbest mayinde dibe û heta ku gefên li ser Rojava disekinin em ê li qadan bin.”
Piştî daxuyaniyê ciwanên ku xwestin bimeşin polîsan êriş kir. Ciwan bi dirûşmeyên, “Bijî berxwedana Rojava” ketin kolanên taxê.
Sêrt
Xelkê Sêrtê bi pêşengiya Platforma Saziyên Demokratîk li Sêrtê bi boneya 1ê Sibatê Roja Rojava ya Cîhanê li pêşiya avahiya DEM Partiyê kom bû û daxuyanî da û meş li dar xist. Di çalakiyê de parlamentera Sêrtê Sabahat Erdogan Saritaş, hevşaredarên Sêrt û navçeyan, her wiha gelek nûnerên rêxistinên civaka sivîl û welatî tev li bûn. Girseyê pankarta “Em bi ruhê yekîtiya neteweyî ya demokratîk 1ê Sibatê Roja Piştevaniya Rojava ya Cîhanê silav dikin” hilgirtin. Di çalakiyê de bê navber diruşmeyên “Bijî berxwedana Rojava”, “Yek e yek e yek e gelê Kurd yek e”, “Bijî Serok Apo” û “Rojava rûmeta me ye” hatin berzkirin. Hevseroka DBPê ya Sêrtê Muazzez Bulgar daxuyaniya hevpar xwend.
Parlamentera Sêrtê Sabahat Erdogan Saritaş di daxuyaniyê de axivî û got: “Gelê Kurd îro li çar aliyê cîhanê li ser piyan e. Rojava rûmeta jiyanê diparêze, hezar silav li hemû gelên bi Xweseriya Demokratîk re ne. Helbet em ê li kêleka kesên mafên wan tê binpêkirin bin.”
Mûş
Li Mûşê bi pêşengiya Platforma Saziyên Demokratîk ji bo 1ê Sibatê Roja Piştevaniya bi Rojava re ya Cîhanê, daxuyaniyek hate dayîn. Daxuyaniya ku li ber avahiya DEM Partiyê ya Mûşê pêk hat pankarta bi kurdî û tirkî ya bi nivîsa “Em bi ruhê yekîtiya neteweyî ya demokratîk 1’ê Sibatê Roja piştrvaniya Rojava ya Cîhanê silav dikin” hate vekirin. Hevserokê navçeya navendî ya DEM Partiyê Faîk Yasûngûr metna hevpar a daxyuyaniyê xwend.
Piştre parlamentera Mûşê ya DEM Partiyê Sumeyye Boz axivî û diyar kir ku ew ê ji bo Rojava li qadê bin û anî ziman ku Rojava bi tenê nîne, divê gelê Rojava qet xwe bi tenê hîs neke.
Erzirom
Platforma Saziyên Demokratîk li Erziromê bi wesîleya rojê meş li dar xist û daxuyaniyek da. Girseya ku li ber avahiya DEM Partiyê ya Erziromê kom bû ber bi Meydana Bajêr a Mahallebaşiyê ve meşiya. Di meşê de dirûşmeyên “Bijî berxwedana Rojava” û “Jin, jiyan, azadî” hatin berzkirin. Metna daxuyaniyê ji hêla hevserokê DBPê yê Erziromê Ramazan Karakaş ve hat xwendin.
Bedlîs
Platforma Saziyên Demokratîk li Bedlîsê jî bi minasebeta rojê meş li dar xist û daxuyaniyek da. Girseya ku li ber avahiya Tetwanê ya DEM Partiyê kom bû, heta Parka Filistînê meşiya. Girseyê di meşê de pankarta “Em bi Ruhê yekîtiya neteweyî ya demokratîk 1’ê Sibatê Roja Piştevaniya Rojava ya Cîhanê silav dikin” ku bi Kurdî û Tirkî nivîsandibû vekirin, lolîpopên bi nivîsa “Jin, jiyan, azadî” hilgirtin.
Parlementerê Bedlîsê Huseyîn Olan piştî meşê axivî û destnîşan kir ku ji bo rûmeta gelê Kurd divê ew Rojava biparêzin.
Bazîd
Li navçeya Bazidê ya Agiriyê, bi boneya 1ê Sibatê Roja Piştevaniya bi Rojava re ya Cîhanê bi pêşengiya Platforma Saziyên Demokratîk meş hate lidarxistin û daxuyanî hat dayîn. Meşa ku li Kolana Mem û Zînê bi pankarta “Rojava ala me ya sor e” pêk hat, Parlamenterên DEM Partiyê yên Agiriyê Sirri Sakik û Nejla Demir û gelek kesên din beşdar bûn. Di tevahiya meşê de, dirûşmeyên “Bijî berxwedana Rojava” û “Em kî ne?” hatin berzkirin.
Dîlok
Bi pêşengiya Platforma Saziyên Demokratîk bi boneya 1ê Sibatê Roja Piştevaniya Bi Rojava Re ya Cîhanê li bajarê Dîlokê bi beşdariya Serokwekîla Koma DEM Partiyê Gulistan Kiliç Koçyîgît daxuyanî hate dayîn. Rêveber û endamên partiyên siyasî, rêxistinên sivîl û bi sedan welatî tev li daxuyaniyê bûn.
Daxuyanî li navenda Dîlokê hate dayîn û pankarta “Qedera gelên Rojhilata Navîn nabe ku teslîmî emperyalîzmê û tarîtiya paşverû bê kirin” û dowîzên, “Keziyên me tirsa we ye”, “Bijî berxwedana Rojava”, “Jin jiyan azadî” hatin rakirin û bênavber dirûşmên dilsoziya bi Rojava re hatin berzkirin.
Gulistan Kiliç Koçyîgît di daxuyaniyê de axivî û bal kişand ser talankirin û komkujiyên li Rojava û dorpêça li ser Kobanê û xwest hikûmeta Şamê li gorî ruhê peymanê tevbigere. Koçyîgît bang li rayedarên Tirkiyeyê kir ku deriyê Murşîdpinarê veke û alîkariya mirovî demildest bigihîje gelê Kobanê. Koçyîgît anî ziman ku ew bi wesîleya rojê piştevaniya berxwedan û destkeftiyên Rojava dikin.
Hatay/Antalya
Platforma Saziyên Demokratîk li Antalyayê û Hatayê jî bi heman armancê daxuyanî dan çapemeniyê. Li Antayayê li ber Rêxistina DEM Partiyê ya Bajar daxuyanî hate dayîn. Di daxuyaniyê de pankarta, “Rojava wijdan e, azadî ye, berxwedan e” hate vekirin û sloganên, “Bijî berxwedana Rojava” û “Bijî berxwedana HSDê” hatin berzkirin. Li Navçeya Îskenderûna Hatayê jî koma li ber Rêxistina Navçeyê ya DEM Partiyê hate cem hev pankarta piştgiriya Rojava dikin vekirin û sloganên dilsoziya bi hêzên Kurd re anîn ziman avêtin. Di axaftinan de banga mezinkirina berxwedanê û parastina Rojava hatin kirin.
Manîsa
Li Manîsayê jî welatiyên ku dixwestin êrişên li dijî Rojava bi daxûyaniya çapemeniyê şermezar bikin rastî astengiya polîsan hatin. Komên ji navçeyên Turgutlu û Salîhliyê hatîn li ketina Manîsayê hatin astengkirin. Li ser wesayîtan û beşdaran kontrola nasnameyê û lêgerîna wesayît û kesan hate kirin. Piştî lêgerînan, wesayît hatin girêdan û birin otoparka pêbawer. Komê ku wesayîtên wan hatibûn desteserkirin, tevî hemû astengiyan jî paşde gav neavêtin. Beşdaran pankarta, “Rojava ne bi tenê ye” vekir û biryar dan ku bi meşê beşdarî daxuyaniya çapemeniyê ya li navenda bajar bibin. Di daxuyaniyên ku di dema meşê de hatin kirin de, hate gotin ku piştgiriya gelê Rojava sûc nine û tevî hemû astengiyan jî ji têkoşînê venagerin.
