Parlametera DEM Partiyê ya Sêrtê Sabahat Erdogan Saritaş di çalakiya Sêrtê de axivî û got: “Em dibêjin ew sînorên we yên ku beriya salan danîbû, êdî ji bo gelê Kurd tu wateya wê nemaye. Rojava em in, em Rojava ne, ji ber vê yekê em Rojava diparêzin.”
Bi pêşengiya Platforma Saziyên Demokratîk ên Sêrtê li gundê Cuwanûka û bajaroka Gokçebagê yên li ser Sêrtê meş hat lidarxistin û piştî meşê jî daxuyanî hat dayîn. Parlametera DEM Partiyê Sabahat Erdogan Saritaş, hevşaredarên Sêrtê Sofiya Alagaş û Mehmet Kaysi, DEM Partî, DBP, aktîvîstên TJAyê, BOTAN-DER û gelek nûnerên saziyên civaka sivîl beşdarî çalakiyê bûn. Di çalakiyê de pankarta “Xwedîderketina Rojava xwedîderketina mirovahiyê ye”, dovîzên “Xedîderketina Rojava xwedîderketina mirovahiyê ye” û “Komujiyên li Rojava rawestînin” hatin hilgirtin û dirûşmeyên “Bijî berxwedana Rojava”, “Kurdistan, Kurdistan gora faşîstan” û “Yek e yek e yek e gelê Kurd yek e” hatin berzkirin.
‘Em hesab û nêzîkatiyên desthilatdaran baş dizanin’
Hevserokê DBPê yê Sêrtê Mûstafa Dayanan ewilî axivî û diyar kir ku çawa ciwanên Kurd li Rojava di sala 2014an de li dijî hişmendiya DAIŞê li ber xwe didin, îro jî bi heman îradeyên li ber xwe didin û wiha axivî: “Wekî ku hûn jî dizanin ev mehek zêde ye, li ser Rojava komkujiyeke mezin tê kirin. Êrişên hovane û hişmendiya DAIŞê li ser destkeftiyên gelê Kurd didomin. Bila vê ya baş bizanibin duh çawa ew kesên ku digotin, Kobanê li ber ketinê ye, lê keç û xortên li ber xwe dan. Duh çawa li hemberî çeteyên DAIŞê sekinin dê îro jî keç xortên Kurdan li hember van çeteyan jî bisekinin. Em ê jî li pişta wan bin û li dijî vê tarîtiyê bisekinin. Em hesab û nêzîkatiyên desthilatdaran baş dizanin. Hezar sal in ku çawa li ser gelê Kurd planên qirêj hatin kirin, îro jî heman tiştî dikin. Bila baş bizanibin kes nikare îradeya gelê Kurd bişikîne.”
‘Em rûmeta cîhanê diparêzin, ya ku hûn jê fêm nakin ev e’
Parlamentera DEM Partî ya Sêrtê Sabahat Erdogan Saritaş jî bal kişand ser kiryarên ku bi salan e Rojava diqewimin û ev tişt anî ziman: “Em dibêjin ew sînorên we yên ku sed sal berê danîbû, êdî ji bo gelê Kurd tu wateya wê nemaye. Rojava em in, em Rojava ne, ji ber vê yekê em Rojava diparêzin. Rojava rûmeta hemû cîhanê ye. DAIŞê jinan di bazarên koleyan de difirotin û bûne bela serê hemû cîhanê. Keç û xortên Kurdan li dijî wê hişmendiya qirêj şer kirin û bi ser ketin. Li dijî vê yekê jiyaneke bi rûmet û wekhev diparêzin. Em rûmeta cîhanê diparêzin, ya ku hûn jê fêm nakin ev e.”
Çalakî bi tilîlî û çepikan bi dawî bû.
