Hevseroka DEM Partiyê Tulay Hatîmogullari û Hevserokên DBPê serdana Partiya Bindestan a Sosyalîst (ESP9) kirin. Hevseroka DEM Partiyê Tulay Hatîmogullari di serdanê de diyar kir ku tevî ku pêvajoya aştiyê ya behsa wê tê kirin heye jî operasyon berdewam dikin û got: “Em ê li dijî wan êrişan li ber xwe bidin û dê heta dawiyê li gel ESP bin.”
Polîsan di 3yê Sibatê de avêt li ser gelek sazî, xaniyên ESPiyan û tevî Hevserokê ESPê Murat Çepnî nêzî 100 kes binçav kirin. Hevseroka DEM Partiyê Tulay Hatîmogullari, Hevserokên DBPê Keskîn Bayindir û Çîgdem Kiliçgun Uçar, Hevberdevkên HDKê, Hevserokên DEM Partiyê yên Stenbolê, nûner û rêveberên partiyên pêkhateya DEM Partiyê bi armanca piştgiriyê serdana ESPê kirin. Serdan li avahiya nûnertiya Hevserokatiya ESPê pêk hat.
‘Em ê li dijî wan êrişan bisekinin’
Hevseroka DEM Partiyê Tulay Hatîmogullari di serdanê de axivî û diyar kir ku ESPya pêkhateya wan rastî êrişan hatiye û got: “ “Hevalên mê yên ESPî ne tenê ye. Di dozekî de 81 kes hatin girtin. Em wan êrişan qebûl nakin. Îro pêvajoyek heye û behsa aştiyê tê kirin lê belê êriş û operasyon berdewam dikin. Em ê li dijî wan êrişan bisekinin û heta dawiyê dê li gel ESPê bisekinin.”
‘Ev operasyona bêdengkirinê ye bi ser nakeve’
Hevberdevka HDKê Meral Daniş Beştaş jî destnîşan kir ku ESP ne bi tenê ye û got: “Ev doz ne hiqûqiye. 81 hevalên bi çi biryarên siyasî hatin girtin? Ji xwe girtina Hevserokê ESP, jin û ciwan vê biryarê aşkere dike. Ev êriş jî weki operasyona KCK ya di sala 2009an de pêk hatibû ye. Lê em dizanin ku cihê êriş heye edalet tune ye. Ev operasyona bêdengkirin bi ser nakeve.”
‘Li dijî êrişan yekîti pêwîst e’
Hevseroka DBPê ya Giştî Çîgdem Kiliçgun Uçar jî anî ziman ku li Tirkiyeyê her tim êriş hebûn û wiha got: “Me dît ku li dijî êrişan yekîtî pêwist e. ESP jî yek ji wan bû. Herdem li cem gelê Kurd sekiniye. Em dizanin ku hevalên me çawa li derve li ber xwe di hundir de jî li ber xwe dan. Cihe ku civak hebê ESP li vir bû û dengê gelê Kurd, karker, jin û ciwanan bilind kiriye.”
‘ESP tu carî serî netewandiye’
Li ser navê ESPê jî Parlamentera DEM Partiyê ya Stenbolê Çîcek Otlu axivî û got: “ESP tu carî serî netewandiye. Hevalên me berî çend rojan daxuyanî dan û diyar kirin ku ew ê li vir bin. Em jî dibêjin çawa ku berê em li qadan bûn em ê dîsa wisa berdewam bikin.”
Piştî axaftinan serdan ji çapemeniyê girtî dom kir.
