TUAY-DERa Êlihê bi awayeke girseyî serdana gelek girtiyên ku bi salan di zindanan de mabûn kir. Hevserokê Giştî yê DBPê Keskîn Bayindir ê tev li serdanan bûye diyar kir ku her rojeke têkoşîna girtiyan ji bo wan bû hêvî û bawerî.
Bi pêşengiya Komeleya Hevgirtinê ya bi Malbatên Girtî û Hikûmxwaran re (TUAY-DER) ya Êlihê bi girseyî serdana Metîn Efeturkê ku bi salan di girtîgehê de mabû, Metîn Toprak ê ku 30 sal di zindanê mabû, Mehdî Atacanê ê ku 32 sal di zindanê mabû û Şukru Baytar ê ku 6 sal di zindanê de hate kirin. Di serdanê de Hevserokê Giştî yê DBPê Keskîn Bayindir, Hevserok û Rêveberên DEM Partiyê û DBPê yên Êlihê, rêveberên TUAY-DERê, Dayîkên Aştiyê, TJA, MEBYA-DER û gelek nûnerên saziyên sivîl tev li serdanê bûn. Herwiha kesên ku bi salan di zindanê de mabûn û malbatên wan şandeya serdanê bi dilgermî pêşwazî kirin.
‘Her rojeke wan bû hêvî û bawerî’
Hevserokê Giştî yê DBPê Keskîn Bayindir ku serdana girtiyên hatine berdanê de axivî û wiha got: “Çavên me, çavên malbatê û çavê hemû gelê me ronî be. Em hêvîdarin ku di demekî nêzîk de em hemû hevalên me yên girtiyên azadiyê di rojên xweş de û bi girseyî pêşwazî bikin. Hevalên ku 30 salan di zindanê mane, bedelekî gelek mezin dane. Her rojeke wan ji bo me û têkoşîna me bû hêvî û bawerî. Dibe ku di nava çar dîwaran de hatibin ragirtin lê hukmê wê li ser hemû Kurdistanê hebû. Çawa ku wan li wir têkoşîn dikir, li vir jî em bi awayekî bênavber têdikoşiyan. Ev qonaxa ku em hatinê bi saya Rêberê Gelê Kurd birêz Abdullah Ocalan û tevgera azadiyê ya Kurd e. Em hêvîdarin dê ev têkoşîn dê bi serkeftinê tacîdar be.”
