Y.J.Ê.Rˊê derbarê hewldanên bêçekirina Êzidiyan de hişyarî da û got: “Her destdirêjiyeke li hêza parastina xweser li Şengalê, rasterast xizmeta vegerandina xetera çeteyên DAIŞê dike.”
Yekitiya Jinên Êzidî ya Rojava (Y.J.Ê.R) derbarê siyasetên li dijî xelkê Şengalê û hewldanên derbekirina projeya Rêveberiya Xweser û berxwedana Êzidiyên li Şengalê de daxuyaniyek da.
Daxuyanî wiha ye:
“Yekitiya Jinên Êzidî ya Rojava, li beramber siyasetên sîstematîk ên li dijî kur û keçên civaka me yê Êzidî têne meşandin, bi fikareke mezin pêşketinên xeternak ên ku Şengalê pê re rû bi rû ye dişopîne.
Em diyar dikin ku Şengala ku di sala 2014an de rûbirûyê fermana hovane ya çeteyên rêxistina dewleta Îslamî bû, ku sûcên qirkirina komî kir û jin hatin kolekirin û zarok hatin revandin, îro nabe ku dîsa bibe qurbanê nexşeyên siyasî û ewlekarî yên ku îradeya gelê wê û mafê wan ê rewa yê birêvebirina karên xwe û parastina xwe paşguh dikin.
Tevegerên leşkerî yên dawî yên artêşa Iraqê û hewldanên bêçekirina Êzidiyan tehdîdeke rasterast a ewlehî û aramiya herêmê ne û deriyê vegerê li ber kaosê û armancgirtina civaka me ji nû ve vedikin. Çekê berxwedana Êzidî tu carî amûreke dagirkeriyê nebû, lê bû parastina gel ji xeteriya komkujiyan, piştî ku her kesî di şert û mercên herî tarî de ew tenê hiştin.
Em hişyar dikin ku van siyasetên di çarçoveya planên dagirkeriyê yên Tirkiyeyê de têne ku Şengal û derdorên wê dikin armanc û hewl didin îradeya Êzidî qels bikin û modela rêxistinî ya wê bişikînin, di xizmeta ajendayên berfirehkirinê yên ku ewlehî û aramiya tevahiya herêmê tehdîd dikin de ne. Her destdirêjiyeke li hêza parastina xweser li Şengalê, rasterast xizmeta vegerandina xetera çeteyên DAIŞê dike.
Em Y.J.Ê.R van xalan li jêr diyar dikin:
Em tevahî şêweyên dûrxistina siyasî yên ku Êzidî li Iraqê rû bi rû ne red dikin û daxwaza mîsogerkirina nûnertiya wan a rasteqîn di saziyên dewletê û biryargirtinê de dikin.
Her hewildaneke ji bo çekê ji Êzidiyan bistînin, berî misogerkirina parastineke navneteweyî ya rasteqîn û rêveberiyeke xweser a bi îradeya gelê Şengalê ve hatî nas kirin, red dikin.
Hikûmeta Iraqê berpirsa parastina Êzidiyan û nehiştina dubarekirina trajediya sala 2014ane.
Bang li civaka navneteweyî û rêxistinên mafên mirovan dikin ku berpirsiyariyên xwe li hemberî tiştê li Şengalê diqewime bicîh bînin û li pêşîya her karesateke nû bigirin.
Jina Êzidî di fermana 2014an de bedelên herî mezin da û em qebûl nakin ku trajedî bi awayên siyasî yan leşkerî yên nû ji nû ve werin pêkanîn. Ewlehî û aramiya Şengalê bi rêzgirtina îradeya gelê wê û mafê wan ê parastina xweser û misogerkirina nevegereke hêzên teror û dagirkeriyê ve girêdayî ye.”
