Artêşa Îsraîlê operasyonên xwe yên li başûrê Libnanê berfireh kir û li Kela Beaufortê (Şiqêf) ya dîrokî ala xwe daliqand. Îsraîlê bi daxuyaniyekê ragihand ku di çarçoveya operasyonên li başûrê Libnanê de ji Çemê Lîtanî derbas bûne û li bakurê çemê operasyonê dimeşînin.
Operasyonên dewleta Îsraîlê yên li ser xaka Libnanê berfirehtir dibin. Hatibû ragihandin ku di rojên dawî de li derdora Kela Beaufortê ya dîrokî ku li ser girekî serdest ê Çemê Lîtanî ye, şer û pevçûnên giran rû didin. Artêşa Îsraîlê têkildarî mijarê daxuyaniyek da û ragihand ku li bilindahiyên Beaufortê û herêma Geliyê es-Slûkiyê bi rojan operasyoneke berfireh pêk aniye. Îsraîlê îdia kir ku armanca wan îmhakirina binesaziya Hizbullahê, bêbandorkirina şervanan û misogerkirina ewlehiya wargehên Celîle û Metûlayê yên li bakurê Îsraîlê ye.
Îsraîlê ala xwe li ser kelehê bi ba kir
Di dîmenên ku ji aliyê artêşa Îsraîlê ve hatine weşandin de, tê dîtin ku leşkerên Îsraîlê ketine keleha dîrokî û ala Îsraîlê li ser kelê daliqandine. Hate diyarkirin ku tûgayên bi navê Golanî û Gîvatî jî di nav de gelek yekîneyên leşkerî beşdarî vê operasyonê bûne. Her wiha artêşa Îsraîlê angaşt ku ew êrişên xwe yên li başûrê Libnanê bi armanca berfirehkirina xeta pêş a parastinê didomînin.
Nêzî 3 hezar û 400 sivîl hatin qetilkirin
Li hemberî van pêşveçûnan, Serokwezîrê Libnanê Newaf Selam bertekeke tund nîşanî êrişan da û Îsraîl bi meşandina siyaseta wêrankirinê ya li dijî Libnanê tawanbar kir.
Bîlançoya mirovî ya êrişên Îsraîlê yên li ser xaka Libnanê roj bi roj girantir dibe. Li gorî daxuyaniyên fermî yên rayedarên Libnanê, ji destpêka şer heta niha di encama êrişan de 3 hezar û 371 kes hatine qetilkirin û zêdetirî milyonek mirov jî neçar mane cih û warên xwe biterikînin û koçber bibin.
Agirbest tenê li ser kaxezê ye
Serokwezîrê Îsraîlê Binyamîn Netanyahu jî beriya niha ragihandibû ku hêzên wan derbasî bakurê Çemê Lîtanî bûne û beşeke mezin a başûrê Libnanê wekî “herêma şer” îlan kiribû. Agirbesta ku di 17ê Nîsanê de di navbera aliyan de hatibû ragihandin, li qadê bi tu awayî pêk nayê û tenê li ser kaxezê maye.
