Siyasetmedara Kurd Ayla Akat Ata ku Wanê di protestokirina qeyûm de axivî û diyar kir ku Rêberê PKKê Abdullah Ocalan ji bo pêvajoyeke nû nexşerêyekê amade dike û got: “Gelê me ji her demê pêtir nêzî azadiyê ye.”
Li Wanê her roj bi pêşengtiya Partiya Herêmên Demokratîk (DBP), Partiya Wekhevî û Demokrasiyê ya Gelan (DEM Partî) û Tevgera Jinên Azad (TJA) tayînkirina qeyûmê ser Şaredariya Bajarê Mezin a Wanê li ber navenda bazirganiyê ya WanMallê daxuyanî tê dayîn. Îro jî daxuyanî bi girseyî hat lidarxistin. Di daxuyaniyê de pankarta “Qeyûm desteserkirina îradeyê ye, ji desteserkirina îradeyê re na” hate vekirin û dirûşmên “Qeyûmê diz, ji Kurdistanê bicehime”, “Qeyûm wê biçe, gel wê were”, “Gelê Kurd li vir e, li gel vîna xwe ye” û “Abdullah Zeydan û Neslîhan Şedal rûmeta me ne” hatin berzkirin. Aktîvîsta TJAyê Ayla Akat Ata, Hevşaredarên Wanê Abdullah Zeydan û Neslîhan Şedal, parlamenterên DEM Partiyê, rêveberên DEM Partiyê û DBPê û gelek welatî beşdarî çalakiyê bûn.
‘Em ti carî bi paş ve gav navêjin’
Hevserokê DEM Partiyê yê Wanê Veysî Dîlekçî ewilî axivî û diyar kir ku gelê Wanê her tim xwedî li vîna xwe derketiye û wê xwedî derketina wan bidome. Veysî Dîlekçî destnîşan kir ku hikûmeta AKP’ê ji 31ê Adarê ti ders negirtiye û got: “Qeyûm bi bêtehamuliya li dijî encamên sindoqan a 31ê Adarê hatin tayînkirin. Piştî ku cezayê dawî li Abdullah Zeydan hat dayîn, AKPê ev yek weke firsend girt û li şûna wî qeyûm tayîn kir. Gelê Wanê êdî ji vê desteserkirina îradeyê re nabêje qeyûm, ji wan re dibêjin diz. Wan heta sibê nobeda xwe li hember dizan girt, lê dizan danê sibê mala gel desteser kirin. Gelê Wanê bi çalakiya nobedê ya li ber şaredariyê derket kolanan berxwedana xwe berdewam kir. Dema hatin, bi komkirina konteynerên çopê dest bi rejîma talanê kirin. Gelê Kurd qeyûman weke talanê pênase kiriye, erê qeyûm talan e. Em ê ti carî li dijî vê talankirin û desteserkirina îradeyê bi paş ve gav neavêjin. Em ê li qadan têkoşîna xwe bidomînin heta em vîna xwe bi dest bixin.”
‘Ji mêj ve şerm ji bîr kirin e’
Ayla Akat Ata jî axivî û anî ziman ku der barê polîtîkaya qeyûman ji aliyê dewletê ve tê meşandin ti gotin nemane ku wan negotiye û wiha got: “Li dijî tinekirin û desteserkirina îradeya ku di nava 11 salan de hatiye kirin, serkeftinek hatiye bi dest xistin? Na. Gelê Wanê di hilbijatinê de ji 14an 14 kir. Xwedê vê yekê nade ti partiyeke siyasî, lê da me. Mirov tenê dikare bişkoka xwe li ber gelê ku vîna xwe ya siyasî bi vî awayî hembêz dike, girê bide. Lê mixabin yên ku vî welatî îdare dikin, ji mêj ve şerm ji bîr kirine.”
‘Pêdivî bi çareseriyeke demokratîk heye’
Ayla Akat Ata bal kişand ser pêvajoya nû û diyar kir ku Rêberê PKKê Abdullah Ocalan wê daxuyaniyekê bide û da zanîn ku rayedarê dewletê Devlet Bahçelî jî di vê mijarê de peyamên zelal dan raya giştî. Ayla Akat Ata anî ziman ku rayedarên dewletê heta îro helwestek berovajî van peyaman nedaye nîşandan û ev tişt got: “Dîsa serokomar negot ez birêz Bahçelî înkar dikim. Ev tê wê wateyê ku her kes li vî welatî pêdiviya xwe bi çareseriyeke demokratîk heye, her kes li vî welatî di dawiyê de hewcedarê aştiyê ye û her kes li vî welatî hewceyê serketinê ye.”
‘Em ji her demê pêtir nêzî azadiyê ne’
Ayla Akat Ata diyar kir ku ev dinya dikare bibe bihuşteke ku gelên Tirkiye û Kurdistanê bi hev re bijîn û divê hemû gel di avakirina vê yekê de bi rol û mîsyon xwe rabin. Ayla Akat Ata wiha dawî li axaftina xwe anî: “Di avakirina vê jiyana hevpar de siyaset dikare destê xwe bide hev û rastiya li meclîsê jî bi awayekî herêmî nîşan bide. Di encamê de ne hewceyî bi van barîkatan, ne jî bi kamerayên kişandinê heye. Gotina me duh azadî bû, îro azadî ye, duh gotina me wekhevî bû, îro jî wekhevî ye, gotina me azadiya birêz Abdullah Ocalan bû ku duh nexşe û nexşerêya çareseriyê derxist pêş. Em îro dîsa heman gotinê dibêjin. Em îro ji duh bêtir bi hêvî ne, îro ji duh çêtir in. Nefikirin ku bi tayînkirina qeyûman ev yek wê pêşiya daxwaza gel a çareseriya demokratîk bigire. Nefikirin ku ev gel li hemberî zilma li wan tê kirin wê çok dane, tiştekî wisa nîne. Em duh li vir bûn, îro jî li vir in. Abdullah Zeydan rûmeta me ye, Neslihan Şedal rûmeta me ye. Em ê bi hev re bi ser bikevin. Gelê me ji her demê bêhtir nêzî azadiyê ye.”
Piştî daxuyaniyê girseyê 5 deqe çalakiya rûniştinê pêk anî û dû re jî heta ber avahiya DBPê ya Wanê meşiyan.
