Amed – Nûnerê ÎHDê yê Bakurê Kurdistanê Tahîr Saçakli diyar kir ku ew di Hefteya Windayan de jî li windayan digerin û bi dîtina windayan aştî û çareseriyek mayînde dikare pêk were. Saçakli got ku divê dewlet bi malbatên windayan re rûnê û lêborînê ji wan bixwaze.
Li Tirkiyeyê Hefteya Windayan e. Ev hefte di navbera 17-30yê Gulanê de tê lidarxistin. Tevî ku 30 sal bi ser çalakiya bila winda bên dîtin û faîl bên darizandin a Dayikên Şemiyê-Xizmên Windayan ve derbas dibe jî lê hê di vî warî de tu gav nehatine avêtin. Di her pêvajoyên çareseriyê de xizmên windayan dibêjin pêwîste dewlet ji malbatên windayan lêborîn bixwaze, cenazeyên windayan bibîne û faîl bên darizandin. Xizmên windayan diyar dikin ku aştiyek mayînde û civakî bi dîtina windayan re pêkan e.
Di vê pêvajoya ku hatiye destpêkirin de malbat dîsa dixwazin ku dewlet ji malbatên windayan lêborînê bixwaze, windayan derxin holê û faîl bên darizandin.
Komeleya Mafên Mirovan (ÎHD) jî pêşengiya çalakiyên Hefteya Windayan dike û daxwaz dike winda werin dîtin û edalet pêk were.
Îsal jî ÎHDê bi boneya Hefteya Windayan daxuyanî dan û daxwaza ji bo dîtina windayan, darizandina faîlan û edaletê dubare kir.
Nûnerê ÎHDê yê Bakurê Kurdistanê Tahîr Saçakli têkildarî pêvajoya tê birêvebirin ji ajansa me re axivî.
‘Winda nehatin dîtin, kujer bêceza tên hiştin’
Tahîr Saçakli bi bîr xist ku li Kurdistanê û Tirkiyeyê di salên 90î de şer gelek giran bû û di nava şerê giştî de jî şerê taybet hat meşandin. Tahîr Saçakli da zanîn ku ew di Hefteya Windayan de jî li windayan digerin û bi hezaran kes hê jî winda ne. Tahîr Saçakli anî ziman ku di nav şerê taybet de windakirina kesan jî yêk ji wan armancan bû û wiha got: “Wekî tê zanîn bi hezaran kes hatin binçavkirin û di binçavan de hatin windakirin. Hin ji wan he jî cenazeyan wan nehatiye dîtin. Em jî li ser navê malbatên windayan, dixwazin ku windayên me werin dîtin. Em windayên xwe dixwazin. Ev di binçavan de hatin kuştin û cenazeyan hin ji wan li cihên cuda hatin dîtin. Şerê hat meşandin û windakirina mirovên di binçavan de di dilê gelê Kurd bû bîrinek mezin. Heta îro jî gelek winda nehatine dîtin. Sedeman neçareserkirina vê pirsgirekê bû êşek mezin di dilê dayik û bavên me de. Em li gelek qadan windayan bi bîr tînin. Li Amedê hefteya 849emîn e. Em dîsa windayan bi bîr tînin. Em dibêjin ku xizmên me yên winda heta îro jî nehatine dîtin, ev winda li ku ne? Divê aqûbeta windayan were eşkerekirin ku malbatên me herin li ser gorên xwe fatîhayek bixwînin. Mirovên me yên ku di binçavan de hatina windakirin, derheqê wan de lêgerîn û lêpirsînek birêkûpêk nehatiye kirin. Bi sedan faîlên windayan hê jî nehatine dîtin. Belkî hin winda hatin dîtin lê kujerên wan nehatin darizandin an jî bêceza hatin hiştin. Hê jî di nav gel de ne.”
‘Divê bi malbatên windayan re hevdîtin bên kirin’
Tahîr Saçakli destnîşan kir ku ji bo çareserî û aştiyek mayînde pêk were hewceyî bi hin xalan heye û wiha axivî: “Yek ji wan xalan pirsgirêkan me werin çareserkirin. Ji bo aştiyek mayînde pêk were û çareserî çêbibe, divê dewlet bi malbatên windayan re hevrû bibe. Daxwaza malbatan jî ev e ku kujer bên darizandin. Bila edelet were bicihanîn, da ku malbatên me jî bizanibin heqê wan vala neçûye. Ji bo bicihanîna edaletê hewce ye dewlet jî li ser van esasan bisekine. Ev xal neyên bicihanîn jî dilê malbatan jî rehet nabe, aştiyêk mayînde jî pêk nayê. Berê jî di Meclisê de komîsyon hatin avakirin lê negihîştin encamê. Di sala 2015an de jî li ser van xalan jî hat sekinandin. Em bi bawerin ku ji bo ev aştiya mayînde pêk were, dê komîsyon werin avakirin û kar û barên xwe bike. Divê bi malbatan re hevdîtin bên kirin û mexdûrbûna malbatan ji holê bê rakirin. Divê ji malbatan lêborîn were xwestin.”
