Şirnex – Li gundê Babekê yê navçeya Hezexê ji ber gol zuha bû, bi hezaran masî mirin. Şeniyên gund diyar dikin ku di demsalên havînê de her sal av kêm dibe û masî dimirin.
Germahiya li Cizîr, Hezex û Şirnexê, di demên dawî de ji 40 pileyan derbas bûye. Ji ber germahî û hişkesaliya ku li herêmê tê jiyîn, çavkaniyên jiyanê kêm dibin. Ji ber kêmbûna avê li gundê Babekê ya navçeya Hezexê ji ber ku gola avê kêm bû ye bi hezaran masî mirin. Gundiyan diyar kirin ku her demsalên havînê bi hezaran masî dimirin û ji bo rêveberiya avê û parastina hewzê piştgirî xwestin. Gundiyan gotin: “Ev rewş ne tenê bandorê li gundên me dike. Lê di heman demê de bandorê li ekosîstema derdorê jî dike. Em bawer dikin ku em dikarin bi hev re çareseriyek ji bo vê pirsgirêkê bibînin.”
