Enqere – Atolyeyên Navenda Çand, Huner û Wêjeyê ya Anatoliyayê ku 2 hefte berê li Enqereyê ava bû dest pê kir. Ji mamosteyan Zelal Angay diyar kir ku wan di hemû beşên hunerê de dest bi atolyeyan kiriye û kesên dixwazin dikarin serî li atolyeyên wan bidin.
Navenda Çand, Huner û Wêjeyê ya Anatoliyayê di 26ê Cotmehê de li Enqereyê ava bû. Saziya navborî bi armanca li dijî yek ziman û yek çandê bi awayekî pirrzimanî û pirrçandî dest bi xebatan kir. Li navendê perwerdehiya tembûr, sêtêl, gîtar, keman, kemençe, erbane, darbûqa, perkusyon, piyano, çelo, bilûr, perwerdehiya deng, şano, wênekeşî, sînema û wênesazî tên dayin. Ji bo zarokan jî xebatên drama, rîtim û koroyê hene. Her wiha perwerdehiya govend û semahê jî hene. Saziyê dest bi atolyeyan kir û serlêdanên ji bo dersan berdewam dikin.
Cihê saziyê li hemberî Meclîsê li navçeya Çankayayê ye. Tevî ku sazî nû vebûye jî eleqeya ji bo wê zêde ye. Sazî li benda şagirt û ciwanan e, her kes dikare bi serlêdanê xwe tev li atolyeyan bike. Mamosteyên saziyê diyar kir ku eleqeyeke zêde ji bo navenda wan heye û heta niha 100 kesan serî li atolyeyan daye.
‘Kêfxweşim ku li vir ji bo neteweya xwe dixebitim’
Ji mamosteyan Haşîm Reşadet bi xwe ji bajarê Mahabadê yê rojhilatê Kurdistanê ye. Haşim Reşadet ku 35 sal in bi karê hunerê ve mijûl dibe û hem li rojhilatê Kurdistanê û hem jî li bakurê Kurdistanê û Tirkiyeyê xebatên muzîkê kiriye. Haşîm Reşadet ku 5 sal in li Enqereyê dijî niha jî li saziya navborî perwerdehiya kemanê dide şagirtan. Haşîm Reşadet anî ziman ku bi têkiliya nasên xwe hatiye saziyê û wiha got: “Ev der karên pirr bi nirx dike. Ez li vir perwerdehiya kemanê didim zarokan. Li vir karekî pirr bi qîmet tê kirin. Ez jî kêfxweşim ku di nav vî karî de me. Li vir hejmara Kurdan pirr zêde ye. Min bêriya Mahabadê kiriye lê li vir hemû heval û hogirên min Kurd in ji ber wê jî ez zêde xerîbiyê nakişînim. Kêfxweşim ku li vir ji bo neteweya xwe dixebitim.”
Di hemû beşan de dest bi atolyeyan kirine
Derhenêr û Şanoger Zelal Angay jî li saziyê perwerdehiya şanoyê dide. Zelal Angay anî ziman ku wan di hemû beşên hunerê de dest bi atolyeyan kiriye û wiha got: “Hemû amurên muzîkê jî li vir hene. Mamosteyên me jî amade ne. Me vê hefteyê dest bi atolyeyên xwe kirin. Ji bo lîstikvaniya şanoyê jî atolyeyên dramayê jî wê dest pê bike. Her wiha ji bo sînemayê û nivîskariya şanoyê jî atolyeyên me wê dest pê bikin. Di hemû beşên muzîk, şano û sînemeya de atolyeyên me dest pê kirin û di demên pêş de wê atolyeyên me berfirehtir bibin. Heta niha bi giştî 100 kesan serî li atolyeyên me dane. Vebûn û destpêkirina xebatên me bi hev re bûn. Serlêdan hê jî berdewam dikin. Di hemû beşan de polek du polên me vebûne. Li aliyekî perwredehiya me didome li aliyekî jî em serlêdanan werdigirin. Kesên dixwazin dikarin werin serî li atolyeyên me bidin.”
‘Xebatên me pirrzimanî û pirrçandî ne’
Zelal Angay diyar kir ku di serlêdanên wan de demeka sînorkirî tune ye û got: “Em dixwazin heta serê salê komeke şanoyê ava bikin. Lê kesên dixwazin tev li koma şanoyê bibin divê herî dereng di nava vê mehê de werin serî li atolyeyên me bidin. Demeke dirêj bû saziyek bi vî rengî tune bû. Em muhtacî hunera Kurdî bûn. Bi vê saziyê em dixwazin vê pêdiviyê bicih bînin. Em bi awayekî pirrzimanî û pirrçandî xebatên xwe dikin. Ne tenê welatiyên me yên Kurd hemû welatiyên li vir, Tirk, Ereb û hemû kes jî dikarin werin li vir perwerdehiya çand û hunerê bibînin. Xebatên hunerê gerdûnî ye, em dikarin bi hunerê ji hevdu fêm bikin.”
