Civîna Şandeya Îmraliyê ya bi Serokê YNKê Bafil Celal Talebanî û Cîgirê Serokê Hikumeta Demborî ya Herêma Kurdistanê Qubad Talebanî re, dawî bû.
Şandeya DEM Partiyê ya Îmraliyê piştî ku di 28ê Kanûna 2024 û 22ê Çileya 2025an de bi Rêberê PKKê Abdullah Ocalan re hevdîtin pêk anî serdanên xwe didomîne.
Serdanên Şandeya Îmraliyê ya li başûrê Kurdistanê berdewam dikin. Şandeya Îmraliyê li Debaşan ya Silêmaniyê bi Serokê Yekîtiya Nîştimana Kurdistanê (YNK) Bafil Celal Talebanî û Cîgirê Serokê Hikumeta Demborî ya Herêma Kurdistanê Qubad Talebanî re civiya. Civîna ku saet di 10an de dest pê kir bi dawî bû.
Tê payîn şande îro bi Endama Mekteba Siyasî ya YNKê Şanaz Îbrahîm Ehmed re jî bicive.
Di şandeya Îmraliyê de kî cih digire
Di şandeyê de endamên Şandeya Îmraliyê Pervîn Bûldan û Sirri Sureyya Onder, Hevserokê Giştî yê Partiya Herêmên Demokratîk (DBP) Keskîn Bayindir, endamên Bûroya Hiqûqê ya Sedsalê Ozgur Erol û Îbrahîm Bîlmez, Hevberdevkê Komîsyona Têkiliyên Derve ya DEM Partiyê Berdan Ozturk, parlamenterên DEM Partiyê Gulcan Kaçmaz Sayyîgît û Mehmet Kamaç cih digirin.
Civînên li gel Mesûd û Nêçîrvan Barzanî
Şandeya Îmraliyê di 16 û 17ê Sibatê de li Hewlêrê bi Serokê PDKê Mesûd Barzanî û Serokê Herêma Kurdistanê Nêçîrvan Barzanî re civînan pêk anîbû.
