Rêxistinên DEM Partî û DBPê yên Qoserê bi daxuyaniyekî bal kişandin ser talûkeya madeyên hişbirê û gotin ciwanên Qoserê bi gefa pişaftinê re rû bi rû ne.
Rêxistinên DEM Partî û Partiya Herêmên Demokratîk (DBP) yên navçeya Qoser a Mêrdînê li Qada Azadiyê ji bo balê bikişînin ser talûkeya bikaranîna madeyên weke tiryakê daxuyanî dan çapemeniyê. Daxuyanî ji aliyê Hevseroka DEM Partiyê ya Qoserê Berçem Ertaş ve hat xwendin. Hevserok Berçem Ertaş got ku di salên dawî de bikaranîna madeyên hişbirê li Qoserê zêde bûye.
Berçem Ertaş diyar kir ku ji ber vê yekê li Qoserê qeyranek civakî derketiye holê û axaftina xwe wiha berdewam kir: “Ciwanên me di salên dawî de bi gefa hişberiya dijîtal û madeyên hişbirê re rû bi rû ne. Bi qasî tê çavdêrîkirin, ev gef her diçe bilindtir dibe. Bikaranîna madeyên hişbir, xûmara dîjîtal, bahîs û meyildariya piyaseyên pereyên dîjîtal bi hemû encamên xwe yên neyênî wekî pirsgirêkeke civakî li pêşberî me ye. Li gorî çavdêriyên me, ev rewş encamên xwe yên giran ên krîza civakî yên wekî xwekuştin, tundiya nav malê, hev berdan û bêhêvîtî hene.”
Divê em rê li pêşiya hişbirê bigirin
Berçem Ertaş bi lêv kir ku ew dixwazin li ser vê mijarê lêkolîn were kirin û wiha dirêjî da axaftina xwe: “Em dixwazin vekolin bê ka di navbera temenên cûda de rêjeya bikaranîna madeyên hişbir û hişberiya dîjîtal çi ye. Sedemên wan derxin holê û qadên bi rîsk diyar bikin û rê li ber bigrin, hişyar bikin û ji bo rehabîlîtasyonê stratejiyan bi pêş bixin.”
Hişbiriya dîjîtal mejiyê civaka me dîl digire
Berçem Ertaş herî dawî bang li gel kir ku li hember vê yekê tevbigerin û axaftina xwe wiha bi dawî kir: “Madeyên hişbir nifşên nû ji nav me dibe, hişberiya dijîtal jî mejiyê civaka me dîl digire. Banga me ji saziyên sivîl, derûnînas, xebatkarên tenduristiyê, medyayên herêmî û her kesên xwe berpirsiyar dibîbînin re ye. Werin em bi hev re li dijî van hişberiyên ku zerarê dide tevna civaka me, em bi hev re tev bigerin.”
Daxuyanî bi çepikan bi dawî bû.
