Hêzên Ked û Demokrasiyê yên Îzmîrê ji bo Denîz Gezmîş, Yusuf Aslan û Huseyîn Înan bernameya bîranînê li dar xist. Piştî bernameyê qurnefîl avêtin deryayê.
Hêzên Ked û Demokrasiyê yên Îzmîrê ji bo Denîz Gezmîş, Yusuf Aslan û Huseyîn Înan ên ku di 6 ê Gulana 1972 an de hatin darvekirin li pêşiya Navenda Çandê ya Turkan Saylan merasîma bîranînê li dar xist. Piştî daxuyaniyê ber bi Qada Gundogdu ve meşiyan. Di meşê de pankarta “Li ser rêya Deniz Yusuf Huseyîn, li dijî şerê emperyalîst serxwebûn û sosyalîzm û dirûşmên “Emperyalîst û hebalbendên wan, fîloyê 6.ji bîr nekin”, “Mirin ji faşîzmê re, yekane rê şoreş e” berz kirin.
Piştî meşê daxuyanî hate dayîn. Daxuyanî ji aliyê nûnera DÎSKê ya Herêma Ege Denîz Şahîn Gumuştekîn ve hate xwendin. Denîz Şahîn Denîz Gezmîş, Yusuf Aslan û Huseyîn Înan bi bîr anî û got: “Têkoşîn duh çawa hatibe meşandin îro jî bi wê awayê didome. Ev gel, li hemberî nizama paşverû û zordar a ku li ser wê hatibû sepandin derket û têkoşîna herî bi rêmet a dîroka xwe, Geziyê afirand. Xwedîderketina li nirxên Geziyê, îro jî parçeyekî girîng ê vê têkoşînê ye. Têkoşîna li dijî bêkariyê, xizaniyê, newekheviyê, talankirina xwezayê û talankirina çavkaniyên giştî; li ser rêya ku Deniz, Mahîr û Îbrahîman vekirine didome.”
Piştî daxuyaniyê girse bi dirûşmên “Yusuf, Denîz, Huseyîn têkoşîna me didome” û “Bijî şoreş, bijî sosyalîzm” berz kirin. Herî dawî qurnefîl avêtin Deryaya Egeyê û çalakî bi dawî bû.
