DFGê rapora meha Tebaxê ya binpêkirina mafên rojnamegeran û astengiyên li ser çapemeniyê belav kir. DFGê got ku di meha Tebaxê de jî gelek mafên rojnamegeran hatine astengkirin û binpêkirin.
Komeleya Rojnamegeran a Dîcle Firatê (DFG) rapora meha Tebaxê ya binpêkirina mafên rojnamegeran û astengiyên li ser çapemeniyê parve kir.
Rapora DFGê bi rengî ye:
“Me mehek ku derheqê rojnamegeran de lêpirsîn hatin destpêkirin, şopandina nûçeyan hatin astengkirin û astengkirina xwegihandina nûçeyan li pey xwe hişt. Meha Tebaxê tevî ku meha betlaneya edlî bû jî derheqê rojnamegeran de lêpirsîn hatin destpêkirin û derheqê gelek nûçeyan de biryara astengkirina xwegihandina gelek weşanan hate dayîn.
Li dijî avahiya rojnameyê êrişa çekdarî
Binpêkirinên di meha Tebaxê de derketine pêş ev in: 2 rojnameger bi êrişan re rû bi rû man. Kesekî li dijî Ofîsa Rojnameya Evrenselê ya Îzmîrê êrişa çekdarî pêk anî. Em vê êrişê wek bûyerek bi tena serê xwe (munferît) nabînin. Divê piştperdeya êrişê were ronîkirin.
Di meha Tebaxê de şopandina nûçeyan a 2 rojnamegeran hate astengkirin û gef li 2 rojnamegeran hate xwarin.
Lêpirsîn û doz
Di meha Tebaxê de derheqê 4 rojnamegerên ku balê kişandin ser talana ekolojiyê û bûyerên tacîzê kirin nûçe lêpirsîn hate destpêkirin. Di vê mehê de danişîna doza 7 rojnamegeran hate lidarxistin.
Di meha Tebaxê de yek ji mijarên ku derketin pêş jî astengkirina xwegihandinê bû.
Astengkirina xwegihandinê
Saziya Agahiyên Teknolojiyê û Ragihandinê (BTK) di meha Tebaxê de hesabên Instagramê ya Ajansa Welat û Rojnameya Xwebûnê ku xwerû bi Kurdî weşanê dikin, hesabê Instagramê yê rojnameya Yenî Yaşamê û KAOS GLê asteng kir. Her wiha saziya navborî hesabên Xê yê Ajansa Nûçeyan a Firatê û Ajansa Nûçeyan a Etkînê jî jixwegihandinê re asteng kir.
Di vê meha bihûrî de xwegihandina malpera Rojnameya Yeni Demokrasiyê jî hate astengkirin. Di meha Tebaxê de 32 malperên enternetê, URLyên 7 nûçeyan û 43 heabên medya dîjîtal hatin astengkirin.
RTUKê cezayê reşkirina ekranê ya 5 rojan li televîzyona TELE1ê birî û 5 caran jî cezayê sekinandina bernameyê birî.
Di van rojên ku em Roja Aştiyê ya Cîhanê pîroz dikin de bênavber û bêserûber êrişên li dijî rojnamegeran û binpêkirinên li dijî rojnamegeriyê didomin. Em bi vê wesîleyê carek din Roja Aştiyê ya Cîhanê pîroz dikin û em daxwaz dikin ku roja aştiyê li hemû cîhanê bibe wesîleya wekheviya gelan ku bi hev re bijîn. Di vê çarçoveyê de em rojnameger meşa aştî û azadiyê wek peywîrekê dibînin û em banga mezinkirina vê meşê dikin.”
