Amed – Parlamentera YNKê Dr. Ala Nûrî ku tev li Konferansa Parlamenterên Jin ên Kurd a li Amedê bû wiha got: “Banga birêz Ocalan dê bandoreke girîng li parçeyên din ên Kurdistanê jî bike. Dema ku gelê Kurd li Bakur bigihîje mafên xwe û aştî çêbe, dê bandoreke erênî li ser parçeyên din ên Kurdistanê jî bike.”
Konferansa Parlamenterên Jin ên Kurd di pêşengtiya Tevgera Jinên Azad (TJA) de di 28-29ê Gulanê de bi dirûşma “Jin siyaseta demokratîk dimeşînin, civaka demokratîk avadikin” li Çand Amedê (Navenda Kongre û Çandê ya Şaredariya Bajarê Mezin a Amedê) ya li navçeya Yenîşehîr a Amedê hate lidarxistin. Aktîvîstên TJAyê di nav de gelek jinên niha parlamanter in û berê parlamenter bûn ji çar aliyên Kurdistanê û Ewropayê tev li konferansê bûn. Parlamenter û siyasetmedarên li Rojava, Şengal û Ewropayê bi awayekî online tev li konferansê bûn. Jinan du rojan nîqaşên girîng kirin û di dawiyê de bi daxuyaniyekê encamnameya konferansê aşkerekirin. Parlementera Yekîtiya Niştimanî ya Kurdistanê Dr. Ala Nûrî ku tev li konferansê bû ji ajansa me re axivî.
Dr. Ala Nûrî diyar kir ku weke parlementerên jin ji başûrê Kurdistanê beşdarî konferansê bûn û wiha got: “Em bi coş û heyecan beşdarî gotûbêjan bûn. Me tecrubeyên xwe yên li başûrê Kurdistanê anîn ziman û bi taybetî ji tecrubeya li bakurê Kurdistanê hînî tiştan dibin û em ê wan tecrubeyan bi xwe re bibin başûrê Kurdistanê da ku em zimanekî hevbeş ava bikin û xebatên jinan li her çar parçeyan bidomînin.”
‘Têkoşîna jinên Kurd gelek taybet e’
Dr. Ala Nûrî destnîşan kir ku têkoşîna jinan li her aliyekî Kurdistanê xwedî taybetmendiyekê ye û wiha domand: “Têkoşîna jinan li her aliyekî Kurdistanê di qonaxekê de ye. Em kêfxweş in ku em li başûrê Kurdistanê heta dereceyeke baş bi pêşvve çûne. Ew jî ji ber wê yekê ye ku ji sala 1991ê ve me parlemento heye û me karî em li başûrê Kurdistanê ji bo xizmeta doza jinan hin qanûnan derxin.”
‘Li Başûr her kes ji banga aştiyê kêfxweş e’
Dr. Ala Nûrî bi lêv kir ku li başûrê Kurdistanê ji bo bangewaziya aştiyê ku niha bi rê ve diçe hemû gelek kêfxweş in û wiha pê de çû: “Em hemû li hêviyê ne ku li bakurê Kurdistanê Kurd bigihîjin mafên xwe yên qanûnî. Em çi weke takekesî çi weke jin bi hemû awayî ji bo pêşveçûna pêvajoya aştiyê ya li bakurê Kurdistanê piştgiriya wê dikin. Diyar e bi salên dûr û dirêj xebata çekdarî hate meşandin, niha ew bangawaziya birêz Ocalan dê bandoreke girîng li parçeyên din ên Kurdistanê bike. Lewma em hêvî dikin bi zûtirîn dem mafên gelê kurd di destûra Tirkiyeyê de cihê xwe bigirin û bigihîjin armancên xwe.”
‘Aştiya li Bakur dê bandorê li her sê aliyê din bike’
Dr. Ala Nûrî di berdewamiya axaftina xwe de ev tişt gotin: “Aştî ne tenê ji bo kurdan ji bo her neteweyî baş e. Aştî yanî seqamgîrî, aştî yanî perwerdeya baştir, tenduristiya baştir, xizmeta baştir. Bêguman dema ku gelê kurd li Bakur bigihîje mafên xwe û aştî çêbe, dê roleke erênî li ser parçeyên din ên Kurdistanê çêbe. Çawa ku di sî salên borî de aştî û seqamgîriya başûrê Kurdistanê û Hikûmeta Herêma Kurdistanê roleke erênî li aliyên din ên Kurdistanê kiriye, bêguman ev yek jî dê bandorê lê bike û em ê pêşvetir biçin înşela.”
‘Yekîtî xewna me hemûyan e’
Dr. Ala Nûrî axaftina xwe bi van gotinan bi dawî kir: “Yekbûn û yekîtiya neteweyî ya kurdan, bi min ne karekî wisa hêsan e. Lê ev gava ku niha parlementerên jin ên kurd avêtine da ku yekîtiya neteweyî di nav jinan de çêbe, dê parelêl be li gel gavên din. Xewna me hemûyan e ku em weke kurd xwedî yekîtî bin, ji ber ku em xwedî yek axê ne û xewna me hemûyan e ku kurd li her ku derê dibin, bibin xwedî mafên xwe.”
