Li Êlihê TJAyê derbarê dosyeya Gulistan Doku de ku beriya 6 salan hatibû windakirin daxuyanî da û got: “Em ê vê pêvajoyê heta dawiyê bişopînin. Em ê bibin dengê Gulistan, Rojîn, Narîn û hemû jinên windayî û hatine kuştin.”
Tevgera Jinên Azad (TJA) derbarê geşedana dawî ya di dosyeya Gulistan Doku de li ber Dadgeha Êlihê daxuyanî da çapemeniyê. Di daxuyaniyê de rêveber û endamên DEM Partî û DBPê yên Êlihê û aktivîstên TJAyê, rêveveberên saziyên sivîl amade bûn. Aktivîsta TJAyê Gulbahar Kaya daxuyanî xwend.
‘Me ji bîr nekiriye û em ê nehêlin ku were jibîrkirin’
Gulbahar Kaya diyar kir ku ew weke jinan dê li qadan bin û got ku bi gotina ‘Jin jiyan azadî’ ew ê dengê xwe ji bo jiyaneke rast û azadiyê bilind dikin û wiha axivî: “Bîra kolektîf a jinan hêza herî xurt e ku vê tarîtiyê ji holê rabike. Ji ber vê yekê em dibêjin, ‘Em ê vê pêvajoyê heta dawiyê bişopînin.’ Em ê dest ji têkoşîna xwe bernedin heta ku rastî eşkere bibe û sûcdar bên darizandin. Em îro jî li meydanan ne. Û em ê sibê jî li meydanan bin. Ji ber ku em zanin kuştinên jinan polîtîk in. Heta ku şîdeta mêr-dewletê berdewam bike, em ê berxwedana xwe xurt bikin. Em ê bibin dengê Gulistan Doku, Rojîn Kabaîş, Narîn Guran û hemû jinên ku her roj ji ber tundiya mêran tên kuştin. Navê her yek ji wan dê di vê têkoşînê de wekî bîranînek, berxwedanek û serhildanek bê jiyîn. Heta ku polîtîkayên bêcezatiyê bi dawî bibin û tundiya mêr-dewletê kêm bibe em ê têbikoşin. Heta ku kujer bên parastin, em ê jî jiyanek wekhev û azad biparêzin. Em ne bi tenê ne. Em bi hev re ne, em ê mil bi mil bin. Me ji bîr nekiriye û em ê nehêlin ku were jibîrkirin.”
‘Ew kar ji bo polîsan karê saetekê bû ku bidîtina’
Xwişka Rojwelat Kizmazê ku bi awayekî guman jiyana xwe ji dest dabû, Roza Kizmaz jî diyar kir ku xwişka wê hevala herî nêzîk a Gulistan Doku bûye û wşga got: “Cenazeyê xwişka min di 9ê Sibata 2024an de sê roj piştî ku ji malê derket di bendava Heskîfê de hate dîtin. Piştî ku Rojvelat windabû me ew ji qereqola polîsan pirsî, lê ji bo lêgerînê tiştek nehat kirin. Sê roj piştre me cenazeyê wê yê bêcan dît. Me bi çavkaniyên xwe li tevahiya Êlihê geriya. Em li her kolanê geriya me her kesî agahdar kir. Lê me encamek bi dest nexist. Ew kar ji bo polîsan karê saetekê bû ku dîtibûna. Lê ew nekarîn xwişka min a ku 3 rojan winda bibû bibînin. Me ji encamên otopsiyê hîn kir ku ew 3 roj in di wî halî de ye. Xwişka min 3 rojan li ku bû? Çima we kare saetekê kir nav 3 rojan? Ger ku em malbateke dewlemendbûna ez bawer im ku ew ê hemû kamerayên bajêr kontrol bikirana û em neçar nediman ku em ê 3 rojan li xwişka min bigeriyan.”
