Rêxistina DEM Partiyê ya Navçeya Beyogluyê derbarê 1ê Gulanê de forûmekê li dar xist. Siyasetmedar Sebahat Tuncel di forumê de axivî û diyar kir ku ew ê li qadên 1ê Gulanê banga aştiyê bikin û got: “Aştî bi têkoşînê dê pêk were. Ev têkoşîn jî bi keda jin, ciwan û kedkaran dê pêk were.”
Rêxistina DEM Partiyê ya Navçeya Beyogluyê ya Stenbolê derbarê 1ê Gulanê de li Parka Haci Ahmetê ya li navçeyê forûmekê li dar xist. Aktivîstên Tevgera Jinên Azad (TJA) Sebahat Tuncel û Çaglar Demîrel û gelek welatî tev li farûmê bûn. Pêşî govend hate gerandin, paşê jî bi beşdariya Sebahat Tuncel, Çaglar Demîrel û Serokê Dev Yapi-Îşê Ozgur Karabûlût forûm hate lidarxistin.
‘Em ê 1ê Gulanê ji bo mafên xwe li qadan bin’
Di forûmê de ewilî Ozgur Karabûlût axivî û got: “Wekî tê zanîn karkerên Kurd gelemperî qada înşaatê dixebite. Em jî ji bo mafê wan dixebitin. Em ê di 1ê Gulanê de ji bo mafên xwe li qadan bin.”
‘Em aştî û azadiyê dixwazin’
Çaglar Demîrel destnîşan kir ku ew îro ji bo 1ê Gulanê civiyan e û wiha axivî: “Me çawa li qadên Newrozê agir geş kir, em ê di 1ê Gulanê de jî ji bo keda xwe li qadan bin. Em aştî û azadiyê dixwazin, ji bo van daxwazan em ê 1ê Gulanê li Stenbolê li Kadikoyê bin.”
‘Em ji bo tu kes neyê kuştin têdikoşin’
Di dawiyê de Sebahat Tuncel axivî. Sebahat Tuncel diyar kir ku îsal 1ê Gulanê xwedî temayek cuda ye û wiha axivî: “Em di serdemeke nû de ne. Em jiyanek wekhev dixwazin. Duh 24ê Nîsanê salvegera Qirkirina Ermeniyan bû. Em ji bo tu kes neyê kuştin têdikoşin.”
‘Em dixwazin azad bijîn’
Sebahat Tuncel di dawiyê de gel vexwend mitînga 1ê Gulanê û axaftina xwe wiha bi dawî kir: “Îro pêvajo tê axaftin. Gel li bendê ye ku bê ka wê çi bibe? Gel dibêje dewlet gav biavêje, tecrîd rabe. Gel dipirse pêvajo xira bûye? Em îro dibêjin bila pêvajo xira nebe û gav werin avêtin. Em dixwazin azad bijîn. Em ê li qadên 1ê Gulanê banga aştiyê bikin. Çawa ku 8ê Adarê, 21ê Adarê em li qadan bûn, em ê di 1ê Gulanê de jî li qadan bin. Lê em dizanin aştî bi têkoşînê dikare pêk were. Ev têkoşîn jî bi keda jin, ciwan û kedkaran dê pêk were.”
Bi konsera Hunermend Rohat, forum bi dawî bû.
