Muzîkjen Mehdî Ahmadpourian berhemek enstrumantal bi navê “Pexşan” amade kir. Ev berhema enstrumantal diyarî Pexşan Ezîzî û Werîşe Muradî hate kirin.
Muzîkjen Mehdî Ahmadpourian ê ji Rojhilatê Kurdistanê ji bo pêşxistina muzîka Kurdî xebatên xwe didomîne. Mehdî Ahmadpourian meqamek bi navê “Pexşan” a enstrumantal amade kir. Berhema ku diyarî girtiyên siyasî yên Kurd Pexşan Ezîzî û Werîşe Muradî hatiye kirin, bi etîketa Kom Muzîkê hat weşandin. Berhem li ser hemû platformên medya dîjîtal ên Kom Muzîkê hate belavkirin.
Kom Muzîkê di metna belavkirina berhemê de vê peyamê belav kiriye:
“Ji bo kesên ku zincîrên koletiyê şikandin!
Ji bo kesên ku ji dîrokê derbas bûn û azadî ji nû ve bi wate kirin!
Di nav her şoreşekê de, demên wisa hene ku qonaxa di navbera çewisandin û azadiyê de ronî dikin, demên ku tê de jin, ne tenê wek beşdarekê lê belê wek rêberan nexşerêya pêşerojê avadikin.
Ev berhem, bo rêzgirtina wan jinên ku felsefeya ‘Jin, Jiyan, Azadî’ ku ne bi tenê di gotinan de, di jiyan û têkoşîna xwe de bi wate dikin, hatiye afirandin.
Pexşan Ezîzî û Werîşe Mûradî di tengasiya zindanê de, li hemberî dîwarên ku ji bo şikandina îradeya wan hatine avakirin rawestiyan û nivîsandin. Ew berdewamiya nifşê wan jinan in ku li kolanên Kurdistanê têgeha azadiyê bi destên xwe afirandin. Jinên ku ji nava çewisandinê civakeke nû avakirin; ne wek objeyek di dîrokê de, lê wek subjeyên rizgariyê, rêberên şoreşê, mîmarên pêşerojê.
‘Jin, Jiyan, Azadî’ ji sê peyvan bêtir, felsefeyek e ku ji berxwedana girtiyên azadîyê, şerê Kobanê, berxwedana Şengalê destpêdike û di parastina nasnameya jinan ya li hemberî hêzên dagirker û serdest de wateya xwe dibîne. Ev felsefe ji dilê ramaneke wisa derket ku azadiyê di rizgariya jinan de dît. Jinên ku ne qurbaniya dîrokê ne, berovajî vê hêzên guherîn û veguherînê û damezrînerên civakeke azad in. Jinên ku êdî li benda rizgariyê namînin, rizgariyê bi destên xwe dihonin.
Pexşan û Werîşe, du jinên ji nav vê felsefeyê ne ku li hemberî makîneya serkutê ya ku hewl da wan bêdeng bike, serî hildan.
Wan di nameyên xwe de li ser rastiyekê wiha nivîsîn ku rejîmên zordar her tim jê ditirsin:
‘An divê mirov jiyanê nejî, an jî divê bi wate û bilind bijî’.
Pexşan, Werîşe, û hemû jinên ku li ser rêya azadîyê dimeşin, ne bi tenê ne. Hemû jinên ku li ber xwe didin. Hemû jinên ku rastiyê diqîrin. Hemû jinên ku zincîran dikin kulmên giredayî, rêhevalên wan in.
Ev berhem ji bo we ye, ji bo jinên têkoşer yên ku dîroka berojaîkirî red dikin û dîrokekê ji nû ve dinûsin!
Jin Jiyan Azadî!”
