Li navçeya Kanîreşê ya Çewligê bertekên li dijî projeya JESê mezin dibin. Jinên herêmê yên ku beşdarî mîtîngê bûne, nerazîbûn nîşanî talana li ser xwezayê dan û bi biryardarî wiha gotin: “Ev der keda me ye. Em Kurdên çiyayî ne, em welatê xwe nafiroşin şîrketên biyanî.”
Li navçeya Kanîreşê ya Çewligê, hewldanên avakirina Santrala Enerjiya Jeotermal (JES) ku tê payîn zirarek mezin bide xwezayê û çavkaniyên debarê yên gel, rastî berteka xurt a welatiyan tê. Li dijî vê projeyê demek e dirêj e nerazîbûn heye û ev nerazîbûna bi mîtîngeke girseyî hate derbirîn. Di mîtîngê de bi taybetî jinên herêmê bi peyamên xwe bûn dengê berxwedana li dijî talankirina xweza û axê.
‘Em doza erd û mafê xwe dikin’
Şefkiye Surmelî ya beşdarî mîtîngê bûbû, bal kişand ser zirara projeyê û wiha got: “Em doza erd û mafê xwe dikin. Rezê me, zarokên me û malê me li vir in. Em teqez nadin wan. Projeya JESê zirarê dide me, ajalên me û zarokên me. Mirina me jî li ser axa me be, em ê ji bo axa xwe şer bikin.” Guler Yilmaz jî bi kurtasî biryardariya xwe anî ziman: “Ev der erdê me ye, keda me ye. Em keda xwe nadin tu kesî. Jiyan û mirina me li ser vê axê ye.”
‘Projeyên wisa aboriya me dibirin’
Vecîde Yildirim destnîşan kir ku ew tu carî paşve gav navêjin û dê heta dawiyê avhewaya xwe biparêzin. Vecîde Yildirim wiha axivî: “Bav û kalên me sedsalan e li vir dijîn. Me canê xwe daye vê axê. Karê me ajaldarî ye, ev proje aboriya me dibire. Em naxwazin fîrmayên biyanî werin ser erdê me. Em vê yekê qebûl nakin.”
‘Welatê me her tiştê me ye’
Jinek din a bi heman hêrsa li dijî talana xwezayê tev li mitîngê bûyî jî Bahar Avcî ye. Bahar Avcî jî daxuyand ku ji bilî welatê wan tu tiştekî wan nîne û hestên xwe wiha anîn ziman: “Her tiştê me welatê me ye. Xwîna me ji bo welatê me ye. Em ê xwîna xwe bidin, lê em axa xwe nadin.”
‘Em welatê xwe nafiroşin Amerîkayê’
Aynur Ozmen jî bal kişand ser qedrê welatê bav û kalan û wiha bang kir: “Gargêbazar, Kanîreş û Gimgim pir şîrîn in. Ev der welatê bav û kalan e. Em welatê xwe terk nakin û nafiroşin Amerîkayê.”
Banga xwedîderketinê
Turkan Acar a ku ji bo şîna cenazeyekî ji Stenbolê hatibû Kanîreşê û tev li berxwedanê bû, banga yekîtiyê li welatiyan kir. Acar wiha domand: “Gava ajalên cîranê we diketin nava mêrga we, we ji bo wê yekê şer dikir. Îro Amerîka tê dikeve nava dilê we, ax û ava we diherimîne. Gerek hûn hişyar bin, çewa ji bo bostek erd bi cîranê xwe re we şer dikir, niha jî dest bidin hev û li dijî kesên dest dirêjî erdê we dikin şer bikin.”
