Rêveberiya Xweser a Kantona Cizîrê ragihand ku ew amade ye destkeftiyên Şoreşa Rojava biparêze û banga tevlêbûna seferberiya neteweyî ku ji hêla HSDê ve hatibû daxuyandin.
Rêveberiya Xweser a Kantona Cizîrê li ser sefreberiya neteweyî ku ji aliyê Rêveberiya Xweser a Herêma Bakur û Rojhilatê Sûriyeyê ve duh hatibû ragihandin, daxuyaniyek da çapemeniyê. Daxuyanî li pêşiya avahiya Meclîsa Rêveber a Bajarê Qamişloyê bi amadebûna endamên meclisên rêveber, gelan û edaletê pêk hat. Hevserokên Meclîsa Rêveber a Kantona Cizîrê Viviyan Beho û Hesen Şero daxuyanî xwendin û ragihandin ku bi her awayî tev li seferberiya neteweyî edibin û banga mezinkirina berxwedanê hate kirin.
‘Tevlêbûna seferberiyê erkek neteweyî ye’
Di daxuyaniyê de wiha hate gotin: “Em bi serbilindî û şanazî berdêlên ku şehîdên me yên leheng dane bi bîr tînin. Di heman demê de em têkoşîna tevahî pêkhateyên gelê me silav dikin ku di rewşên zehmet de ku bi hev re ezmûneke demokratîk a pêşeng a xwe dispêre îradeya gelan, jiyana hevbeş û edaleta civakî ava kirine. Em tevlêbûna xwe ya seferberiya giştî radighînin. Ji bo parastin gelên me û şoreşa me, ji bo xurtkirina rihê berxwedanê û parastina ax û rumetê ev seferberî erkekî neteweyî û exlaqî ye. Her wiha bi nêzîkbûna salvegera 13`mîn ya damezrndina Rêveberiya Xweser re divê ev erk veguhere hişmendî, rêxistinbûyîn û berpirsyariyeke giştî.”
‘Aştî ancax bi xweparastinê pêkan e’
Di daxuyaniyê de hate ragihandin ku wekî Rêveberiya Xweser dê heta dawiyê girêdayî nirxên şoreşê bin û destkeftiyan biparêzin. Hevserokan balkişand ser van xalan: “Her wiha em radighînin ku em aliyekî çalak û daîmî di her hewldaneke ji bo çareserkirina tevahî pirsgirêkên ku Sûriyeyê tê re derbas dibe bimînin. Ev yek ji baweriya me ya bi diyalogê tê ku vebijêrekeke stratejîk a çareseriyasî siyasî ya demokratîk û nenavendî ku mafên hemû pêkhateyan mîsoger bike û aştî û aramiyê pêk bîne. Em teqez dikin ku em banga aştiyê dikin. Di heman demê de em radighînin ku aştiya rasteqîn bêyî xweparastin pêk nayê. Lê eger şer li ser me were ferzkirin û hebûn û mafên gelê me werin hedefkirin, em teqez dikin ku em amade ne parastina xwe bikin û em ê li hemberî çi gefên ku li ser ewlehiya herêmên me werin kirin bisekinin.”
‘Mafên me ne mijara bazarê ne’
Di berdewama daxuyaniyê de hate gotin ku mafên gelan ên rewa û zagonî ne mijara bazarê ne û wiha hate domandin: “Em teqeziyê li ser mafên rewa yê destûrî yê tevahî pêkhateyên herêmê dikin, ji ber mafekî esîl ku nabe were înkarkirin an bazar li ser wê were kirin. Ji bo vê jî em dixwazin ku ev maf di destûrekê ya di çarçoveya Sûriyeya demokratîk a pirrengî ku wekhevî û edaletê ji bo tevahî gelê wê garantî bike werin bicihkirin. Ji kantona Cizîrê careke din em teqez dikin ku hêza me di yekitiya pêkhateyên Kurd, Ereb, Asur û Suryan de bû û dê wisa bimîne. Di dîrokê de em bi hev re jiyan, di siberojê de jî em ê bi hev re bijîn. Xwîna şehîdên me li ser vê axê tev li hev bû. Hemûyan mil bi mil ji bo parastina azadî, rûmet û jiyana hevbeş berdêl dan. Careke din em doz didin gelê xwe ku em wefadarên rêgezên Rêveberiya Xweser bin. Em ê seferberiyê bidomînin ta rewşa herêmê aram bibe.”
