Amed – Xalê Ehmed, 30 sal in ku kameraya xwe wekî çekekê hildaye, bajar bi bajar, gund bi gund û zozan bi zozan digere, çanda kevnar a Kurdan qeyd dike û parve dike.
Di nava çiyayên bilind ên Kurdistanê de, di gundên kevnar û zozanên rengîn de, dengekî qedîm her tim olan dide û belav dibe. Dengê dengbêjan, çîrokbêjan û stranên gelêrî yên ku dîroka civakekê diparêzin. Xalê Ehmed, zêdetirî 30 salan e ku kameraya xwe wekî çekekê hildaye, bajar bi bajar, gund bi gund û zozan bi zozan digere, çanda kevnar a Kurdan qeyd dike û parve dike.
Arşîveke rengîn
Ev xebata wî ya dewlemend ne tenê dîmenên rengîn in, lê belê bîra civakê ya Kurdan e ku li dijî înkar û asîmîlasyonê radibe. Di nava 30 salan de, ew bi hezaran kîlometre rê çûye, çûye ba dengbêjên kevnar ên li gundên dûr, çîrokbêjên ku dîroka devkî ya Kurdan diparêzin û hemû bi kameraya xwe qeyd kirine. Di van vîdeoyan de, gelek dengbêjên ku jiyana xwe ji dest dane hene. Stranên kevnar yên li ser evînê, şer, koçberî û dîroka Kurdan dibêjin, ku wekî arşîveke zindî têne parastin hene.
Têkoşîna li dijî asîmîlasyonê
Ev rêwîtiya Xalê Ehmed ne tenê gerîneke, lê belê têkoşînek e li dijî polîtîkayên asîmîlasyonê yên dewleta Tirk. Di vîdeoyên wî de, rengîniya Kurdistanê diyar dibe. Ji çiyayên Zagrosê bigire heya zozanên başûrê Kurdistanê, ji gundên kevnar ên li Amedê bigire heya Çiyayê Şengalê. Wî ne tenê dengbêj qeyd kirine. Her wiha wî jiyana rojane ya Kurdan, stranên gelêrî, rîtuelên kevnar û peyzajên xwezayî yên bêemsal jî belge kirine.
Dengê gelê Kurd
Xalê Ehmed bi vê xebatê, ne tenê çandê diparêze. Ew di heman demê de nifşên nû teşwîq dike ku bi mîrata xwe re têkildar bin. Di demeke ku medyaya dîjîtal her tiştî diguherîne, qemeraya wî bûye pira di navbera demên kevnar û nû de. Kameraya wî ne tenê dîmen digire. Di heman demê de dengê gelê Kurd ê ku dixwaze bijî, qeyd dike. Ev têkoşîna wî ya 30 salî, îro jî berdewam dike û ev ne tenê arşive, ev gotina “Em hene” bi zimanê herî xweşik e.
Xalê Ehmed vê eşqa xwe ya tomarkirina denbêjiyê û dengbêjan bi gotina “Ez li dijî polîtîkayên bişaftina çanda Kurdan, parazvaniya çand û hunera Kurdî dikim” cewhera armanca lêgerîna xwe tîne ziman.
