Meşa TJAyê di roja sêyemîn de gihişt gundê Amarayê. Parlamentera DEM Partiyê Berîtan Guneş a li vir axivî û destnîşan kir ku dê jin bi sekna xwe encama vê pêvajoyê diyar bikin û got: “Ev meşa me dîrokî ye dê encamê diyar bike û rêzdar Ocalan azad bike.”
Tevgera Jinên Azad (TJA) bi dirûşma “Em bi hêviyê ber bi azadiyê ve dimeşin” di 1ê Cotmehê de ji Amedê ber bi Enqereyê ve meş da destpêkirin. Meş, di roja sêyemîn de li navçeya Xelfetiyê ya Rihayê berdewam dike. Jinên ku hatin ber avahiya Rêxistina Partiya Wekhevî û Demokrasiyê ya Gelan (DEM Partî) a Xelfetiyê kom bûn li vir stran gotin û dirûşmên “Jin jiyan azadî, azad bikin Rêbertî” û “Bijî Serok Apo” berz kirin. Jin dû re ji vir ber bi gundê Amarayê ve ku Rêberê Gelê Kurd Abdullah Ocalan lê ji dayik bûye bi rê ketin. Jin bi coş û kelecana xwe û berzkirina dirûşman gihîştin gundê Amarayê. Jin li gund bi dirûşm û çepikan hatin pêşwazîkirin. Jinên ku bi dirûşman ketin baxçeyê mala Rêberê Gelê Kurd Abdullah Ocalan ji aliyê birayê wî Mehmet Ocalan û xizmên wî ve hatin pêşwazîkirin. Li baxçeyê xanî posterê mezin ê Abdullah Ocalan û pankarta TJAyê ya li ser “Em bi hêviyê ber bi azadiyê ve dimeşin” û “Jin jiyan azadî” hatin daliqandin. Jinan li ber malê bênavber dirûşmên dilsoziya bi Abdullah Ocalan re berz kirin.
‘Têkoşîna we pîroz e’
Mehmet Ocalan ewilî axivî spasiya jinan kir û got: “Hûn hemû bi xêr hatin. Têkoşîna hûn didin pîroz e. Her tişt bi ked û têkoşînê bi dest dikeve. Em spas dikin rêya we vekirîbe serkeftin ji we re.”
Piştre Parlamentera DEM Partiyê ya Mêrdînê Bêrîtan Guneş axivî.
‘Îro daxwaza azadiya rêzdar Ocalan ji heft parzemînan derbas bûye’
Berîtan Guneş bal kişand ser hevdîtina îro li Îmraliyê pêk tê û got ew silavên xwe ji Abdullah Ocalan re dişînin. Berîtan Guneş diyar kir ku wateya Amarayê ji bo gelê Kurd gelek mezin e û wiha got: “Em şehîdên Amarayê bi bîr tînin. Em saya wan li vir in.” Berîtan Guneş ji jinên enternasyonalîst re jî silav şandin û wiha domand: “Tevahiya jinên enternasyonalîst ku azadiya birêz Ocalan dixwazin silav dikin. Îro daxwaza azadiya rêzdar Ocalan ji heft parzemînan derbas bûye. Azadiya rêzdar Ocalan pêwendiyeke jiyanî û gelan e.”
‘Ev meşa me ya dîrokî ye dê encamê diyar bike’
Berîtan Guneş destnîşan kir ku daxwaza wan a sereke azadiya fizîkî ya Ocalan e û wiha pê de çû: “Êdî em azadiya fizikî ya rêzdar Ocalan dixwazin. Hêj jî mafê hêviyê dikin mijara niqaşê divê hûn pêk bînin. Jin dê bi sekna xwe encama vê pêvajoyê diyar bikin. Ev meşa me dîrokî ye dê encamê diyar bike û rêzdar Ocalan azad bike.”
Perspektîfa Abdullah Ocalan hate xwendin
Axaftina Berîtan Guneş “Jin jiyan azadî, azad bike Rêbertî” bi dawî bû. Paşê jî aktîvîsta TJAyê Fatma Ablay beşeke perspektîfa “Aştî û Civaka Demokratîk” a Rêberê Gelê Kurd Abdullah Ocalan xwend.
Piştre jinan bi komî wêne kişandin û dirûşma “Bijî Serok Apo” berz kirin. Jin dê ji Amarayê ber bi navçeya Bêrecûkê ve bimeşin û paşê derbasî Dîlokê bibin.
