KASEDê 6emîn salvegera damezirandina xwe li Konaxa Cemîl Paşa bi şahiyekê pîroz kir. Seroka KASEDê Salîha Ayata destnîşan kir ku ew berdewama kevneşopiya 34 salan in û got: “Em berdewama têkoşîna Mizgînan, Asyayan û Ferîdeyan in.”
Komeleya Çand, Huner û Wêjeyê ya Jinan (KASED) bi boneya 6emîn salvegera damezrandina xwe li Qonaxa Cemîl Paşa şahiyek li dar xist. Gelek nûnerên saziyên jinan, jinên hunermend, şanoger, sînemager, nivîskar, saziyên jinan û gelek kes tev li şahiyê bûn. Jin bi cilên xwe yên herêmî tev li konserê bûn.
‘Em li dijî baviksalarî û qedexeyan têdikoşin’
Seroka KASEDê qala kevneşopiya ku KASED xwe dispêre kir û da zanîn ku ew berdewama dehan salan in û wiha got: “Dibe ku dîroka KASEDê şêş salî be lê em xwe dispêrin xebatên çand û hunerê yên 34 salan ên bakur û metropolên Tirkiyeyê Em xwe dispêrin xebatên NÇMê. 34 sal in em li hember qedexeyan, li hember tundiyê li hember baviksalariyê têdikoşin. Jin dikarin îro ji ber destkeftiyên van salên dirêj binivîsin, filman bikêşin, şanoyan bilîzin. Em vê mîrateyê ji Mizgînan Ferîdeyan Asyayan digirin. Heya niha me gelek bedel û kedekî bêhempa da. Lewma KASED ne navê saziyekê ye, navê levneşopiyekê ye. Em ji vê kevneşopiyê tên. Bijî çand, huner û zimanê kurdî.”
Li pey axaftinan jinan cih bi cih tev li stranên hunermend Rûken Yilmaz bûn, cih bi cih govend gerandin. Şahî bi tilîlî, govend û berzkirina dirûşma ‘Jin, jiyan, azadî’ bi dawî bû.
