Platforma Jinan a Dîcle Amedê û Tora li Dijî Tundiyê meşa 25ê Mijdarê li dar xist. Piştî meşê daxuyanî hat dayîn û wiha hat gotin: “Mîrabal bigire heta Rosa Luxemburg, ji Sakîne Cansiz bigire heta Denîz Poyraz, ji Nagîhan Akarsel bigire heta Gulistan Tara û heta Jîna Emînî em têkoşîna hemû jinan hildigirin!”
Meşa ku ji bo minasebeta 25ê Mijdarê Roja Têkoşîna li Dijî Tundiyê ya li Ser Jinan a Navneteweyî hate lidarxistin gelek endamên partiyên siyasi, nunerên saziyên sivîl bi sedan jin tevlî bûn. Meşa ku li ber Girtîgeha Hejmara 5emîn destpê kir û li ber AZC Plazayê ya Semta Ofîsê ya navçeya Yenîşehîrê qediya. Dawiya meşê de daxuyanî hat dayîn û axaftin hat kirin.
Li ser navê Platforma Jinan a Dîcle Amedê Rûçem Vefa Elyakut daxuyanî xwend û wiha got: “Ji Xwişkên Mîrabal bigire heta Rosa Luxemburg, ji Sakîne Cansiz bigire heta Denîz Poyraz, ji Nagîhan Akarsel bigire heta Gulistan Tara û heta Jîna Emînî em têkoşîna hemû jinan hildigirin! Berdewamiya girtina jinên nexweş di girtîgehan de ji ber têkoşîna wan a ji bo ‘aştî, azadî û wekheviyê’ di demekê de ku danûstandinên aştiyê didomin, yek ji astengiyên herî mezin ên li pêşiya edalet û aştiyê ye. Tundûtûjiya dewleta mêr li her derê ye!”
Rûçem Vefa Elyakut di berdewamiya axaftina xwe de bal kişand ser Peymana Stenbolê û hejmara jinên ku meha cotmehê li bajarê Tirkiyeyê hatine qetilkirin û got: “ Li Tirkiyeyekê ku jin her roj têne kuştin, tenê di cotmehê de 27 jin û di 10 mehên pêşîn ên salê de 357 jin hatine kuştin, tiştê ku em wekî jin û civak hewce ne ne Pakêta Dadwerî ya 11an a tirsnak e; ew ji nû ve bicîhanîna Peymana Stenbolê û bicîhanîna bi bandor a Qanûna Hejmara 6284an e!”
Rûçem Vefa Elyakut axaftina xwe bi daxwazên jinan qedan û wiha got: “Em mafên xwe, laşê xwe, keda xwe û azadiya xwe li dijî kesên ku jiyana me paşguh dikin diparêzin. Em dixwazin li welatekî bê tundûtûjî, wekhev, azad û aştiyane bijîn, ku keda me lê bi qîmet be.”
‘Wê jin civakek azad ava bikin’
Piştre Berdevka DEM Partiyê Ayşgul Dogan axivî û wihat: “ Di civakê de qirkirin serî de jina hedef digirin. Jin dema biryar didin tu kes nikare li hemberî biryara wan bisekine. Divê me ji bo jiyanek nû amade bin. Em ê bi civakek demokratîk ji bo hemû gel nasname, çand û zimanan bi afirînin. Tişta ku em ji xwe re dixwazin ji bo hemû kesî jî dixwazin. Em dibêjin ji qirkirina jinê re êdî bes e, ji qirkirina xwezayê re bes e. Em nikarin ji rizîbûna civakê re temaşewan bimînin. Ev tiştan hemû ji ber hincetên şer dihatin kirin. Lê îro Rêzdar Ocalan hemû hincetên wan ji destê wan kişand. Her tişt li holê ye sekin û daxwazê me jinan jî. Êdî em li hemberî hemû tundiyan bibin yek.”
Piştî axaftina girse bi berzkirina dirûşmeya “Jin jiyan azadî” belav bû.
