Mujgan Hesenpur ji Lahîcanê ku ji bo serdana gora xizmên xwe çûbû goristanê, ji ber bi hinceta cil û bergên wê ne li gorî zihniyeta zilamê paşverû ye, ji hêla zilamekî paşverû ve bi 5 guleyan hat qetilkirin.
Di 21ê Gulanê de Mujgan Hesenpûr (46) ji bo serdana gorên dê û bavê xwe bike, bi kurê birayê xwe yê 7 salî re çû goristana Lahîcanê. Lê belê piştî çend saetan ev serdan veguherî yek ji mînakên herî asayî yên tundiyê yên bi hîcaba mecbûrî ve girêdayî.
Li gorî agahiyên hatine belavkirin dema Mujgan li goristana Lahîcanê bûye, zilamekî çekdar rexne li cilên wê kiriye û jê re gotiye ‘bala xwe bide ser hîcaba xwe.’ Li gorî agahiyan Mujganê bersiva ‘Cilên min meseleyeke şexsî ne û yên din eleqedar nakin’ daye. Li gorî şahidên bûyerê, nîqaş gur bûye û êrîşkar berê çeka xwe daye ser wê lê Mujgan nerazîbûna xwe domandiye. Li gorî gotinan, hewldana yekem a êrîşkar a gulebaranê bi ser neketiye û çeka wî asê maye; li ser vê yekê ew kes demeke kin ji cihê bûyerê derketiye û çûye.
Lê li gorî gotinên şahidan çend deqe şûnde, êrîşkar vegeriya goristanê û vê carê 5 gule li Mujgan Hasanpur reşandiye û paşê bi lez û bez reviya ye. Piştî êrîşa çekdarî li goristanê panîk û gelimşe çêbûye. Kesên li cihê bûyerê, hewl dane beriya ku tîmên bijîşkî werin alîkariya Mujgan bikin. Mujgana ku bi giranî birîndar bû, rakirine nexweşxaneyê lê tevî hemû hewldanên bijîkan jî nehatiye rizgarkirin.
Tundiya ji ber cil û bergan
Nûçeya kuştina Mujgan Hasanpur nîqaşa li ser aliyên civakî û ewlehiyê yên polîtîkayên hîcaba mecbûrî dîsa anî rojevê. Bikarhênerên medyaya civakî bûyerê wekî mînakek din a alozî û tundiya avahîsaziyê ya ku ji ber zexta cil û bergan li ser jinan çêdibe, bi nav kirin.
Di salên dawî de, bi zêdebûna xwepêşandanên li dijî hîcaba mecbûrî ya li Îranê, raporên pevçûn, tundî û zexta li ser jinan, li qadên giştî jî zêde bûne. Ev pêvajo piştî mirina Jîna Emînî û tevgera ‘Jin, Jiyan, Azadî’ ya paşê, bêtir balê dikişîne.
