Serokomarê Fransayê piştgirî da lihevkirina di navbera Rêveberiya Xweser û desthilata Şamê û wiha got: “Pêşniyara min ji Ehmed Şera re ew bû ku di têkoşîna li dijî DAIŞê de hevkariya HSDê bikin.”
Serokê desthilata Şamê Ehmed Şera, Wezîrê Karên Derve yê desthilata Şamê Esed El Şîbanî û Serokê Desteya Awarte û Karesetan a desthilata Şamê Raêd El Salih li ser vexwendina Serokomarê Fransayê Emmanuel Macron di saetên êvarê de çûn Parîsê.
Şandeya desthilata Şamê ya di pêşengiya serokê desthilata Şamê Ehmed Şera, li Qesra Elysee bi Serokomarê Fransayê Emmanuel Macron re civiya. Piştî civînê daxuyanî hat dayîn.
Serokomar Macron di daxuyaniyê de diyar kir ku ew piştgiriya her lihevkirinek di navbera Rêveberiya Xweseriya Demokratîk ya Bakur û Rojhilatê Sûriyeyê û desthilta Şamê de dike û wiha axivî: “Pêşniyara min ji Ehmed Şera re ew bû ku di têkoşîna li dijî DAIŞê de hevkariya HSDê bikin. Ji ber ku hebûna DAIŞê li Sûriyeyê li ser aştî û ewlekariya navneteweyî gef e.”
