Rayedarên Rejîma Îranê Mafê tedawiyê yê Werîşe Mûradî ku li Girtîgeha Evînê tê ragirtin, asteng dikin
Mafê tedawiyê yê Werîşe Mûradî ku ji hêla rejîma Îranê ve hatibû girtin, jê re cezayê darvekirinê tê xwestin û li Girtîgeha Evînê tê ragirtin, tê astengkirin. Li gorî agahiyên Rêxistina Mafên Mirovan a Hengawê parve kirine, nexweşiyên Werîşe Mûradî yên fitqa piştê û stû hene lê nayê tedawîkirin. Hat destnîşankirin ku bijîşkan 5 meh berê jê re gotine ku divê tavilê emeliyeta bibe lê tevî vê yekê jî rayedarên girtîgehên destûrê nadin Werîşe Mûradî sewqî nexweşxaneyê were kirin.
Nêrgîz Muhamed bang kir
Parêzvana mafên mirovan Nêrgiz Mihemedî ji bo Werîşe Mûradî bang kir û got; “Di rejîmên zordar de ji ber ku sîstema edaletê serî li ber desthilatdariya otorîter ditewîne, rabûna li ber cezayê darvekirinê divê meseleya her kesî be.”
Kampanya hatibû destpêkirin
Ji bo piştevaniya Werîşe Muradî li ser medya dijîtal ya înstagram û X’ê bi sernavê ‘Bibin dengê Werîşe Muradî’ kampanyaya heştegê hatibû destpêkirin. Çalakvan û azadîxwazan daxwaz li welatiyên Kurd kirin ku bi yek dengî piştevaniya Werîşe Muradî bikin û Bêgunehiya vê girtiya siyasî ji cîhanê re ragihînin.
Tenduristiya wê xerab dibe
Kampanya Azadî ji bo Werîşe Mûradî ragihand ku rewşa tenduristiyê ya Werîşe Mûradî xirabe û got: “Rayedarên zindanê rê nadin ku biçe derve bê dermankirin.”
Werîşe Mûradî 1ê Adara 2023an li Sine hate binçavkirin. Cezayê darvekirinê ya Werîş Mûradî ku di rûniştina wê ya di 16ê Hezîran û 4ê Cotmeha 2024an de hate dîtin bi fermî ji parêzerên wê re hatiye ragihandin.
