Şaxa SESê ya Anadoluyê bi boneya “Roja Têkoşîna li dijî Tundiyê ya Qada Tenduristiyê” û salvegera kuştina bijîşk Ersîn Arslan daxuyanî da û êrişên li ser bijîşkan şermezar kir.
Bijîşk Ersîn Arslan di sala 17 Nîsana 2012an de li Dîlokê hatibû kuştin. Şaxa Sendîkaya Kedkarên Tenduristiyê û Xizmeta Civakî (SES) ya Anadoluya Stenbolê bi boneya “Roja Têkoşîna li dijî Tundiyê ya Qada Tenduristiyê” û salvegera kuştina bijîşk Ersîn Arslan, li pêşiya Nexweşxaneya Dewletê ya Umraniyeyê daxuyanî da. Di daxuyaniyê de nûner û rêveberên Şaxa SESê ya Stenbolê û kedkarên tenduristiyê amade bûn. Di daxuyaniyê de pankarta “Divê di qada tenduristî, perwerdehî de û li kolanan tundî bi dawî bibe” hate vekirin. Daxuyanî ji aliyê Sekretera Komîsyona Jinan a Şaxa SESê ya Anadoluyê Sevgî Mersîn ve hat xwendin.
‘Pergala tenduristiyê her ku diçe têk diçe’
Sevgî Mersîn di destpêka axaftina xwe de di şexsê Ersîn Arslan de kedkarên tenduristiyê bi bîr anî û wiha got: “Ev demekî direj e em li dijî tundiyê dixebitin. Me gelek caran li dijî tundiyê çalakî li dar xist. Bi têkoşîna me di zagonan de hin guherandin pêk hatin lê belê ev ne bes in. Divê guhertinên hê dijwartir bê. Em kedkarên tenduristiyê di nava zext û zordariyê dixebitin. Rêveber zorê li me dikin. Xizmên nexweşan êrişî me dikin. Pergala tenduristiyê her ku diçe têk diçe.”
‘Em ê heta dawiyê têbikoşin’
Sevgî Mersîn destnîşan kir ku îro di nexweşxaneyan de sedan polîs hene lê her ku diçe bûyerên tundiyê zêdetir dibe û axaftina xwe wiha bi dawî kir: “Tundî di salên ku ‘di tenduristiyê de guherandin’ pêk hatin de dest pê kir. Ev di desthilatdariya AKPê de bi pergala bazarê zêde bû. Gelek bûyerên tundiyê pêk tên. Lê em dizanin ku ev ne tenê fîzîkî ne. Parastina tundiya civakê encax bi demokratîkbûyîna civakê dikare pêk were. Pêşîlêgirtina tundiyê înşakirina pergaleke nû ye. Lê divê ev pergal li cem kedkarên tenduristiyê bisekine. Em ê heta dawiyê ji bo mafên xwe têbikoşin.”
