Ligel biryara dirêjkirina agirbestê ya ji aliyê Serokê DYAyê Donald Trump ve jî rageşiya li Tengava Hurmuzê nesekinî û hêzên Îranê dest danîn ser du keştiyan. Ji aliyê din ve, nîqaşên agirbestê yên di navbera Îsraîl û Libnanê de jî li Washingtonê dewam dikin.
Şer û rageşiya di navbera Dewletên Yekbûyî yên Amerîkayê (DYA), Îsraîl û Îranê de berdewam dike. Serokê DYAyê Donald Trump, dema agirbesta du hefteyan a bi Îranê re dirêj kir. Trump di daxuyaniya xwe de destnîşan kir ku ji bo bi dawîkirina şer tu “demek diyarkirî” tune ye û DYA dê ambargoya xwe ya deryayî ya li ser benderên Îranê bidomîne.
Îran: Ambargo ranebe tengav venabe
Serokê Meclisa Îranê Mihemed Baqir Qalîbaf bertek nîşanî dewamkirina dorpêça DYAyê da û ambargoya deryayî wekî “binpêkirina eşkere ya agirbestê ye” pênase kir. Qalîbaf got ku heta ambargo ranebe vekirina Tengava Hurmuzê nepêkan e. Her wiha Berdevkê Wezareta Karên Derve ya Îranê jî da zanîn ku wan hîn biryar nedane bê ka ew dê beşdarî gera nû ya hevdîtinên aştiyê yên li gel DYAyê bibin an na.
Li Tengava Hurmuzê 2 keştî hatin desteserkirin
Tevî agirbestê, li qada deryayî şer kûr dibe. Hêzên Pasdarên Şoreşa Îranê li Tengava Hurmuzê êrişî 3 keştiyên bazirganiyê kirin û dest danîn ser 2 keştiyan. Rayedarên Îranê diyar kirin ku ev gava wan li hemberî dorpêça DYAyê ye. Qesra Spî jî li ser mijarê daxuyaniyek da û îdia kir ku desteserkirina keştiyan şert û pîvanên agirbestê binpê nake. Ev rewş bû sedem ku li bazarên cîhanê bihayê petrolê zêde bibe.
Hevdîtinên Îsraîl û Libnanê didomin
Li aliyê din, bandora şer li ser xeta Îsraîl û Libnanê jî dewam dike. Şandeyên Îsraîl û Libnanê ji bo hevdîtinan li paytextê DYAyê Washingtonê civiyan. Armanca Libnanê ew e ku agirbesta 10 rojî ya ku di 17ê Nîsanê de ketibû meriyetê, ji bo mehekê dirêj bike. Rayedarên Îsraîlê beriya civînê daxuyanî dan û diyar kirin ku tu pirsgirêkên wan ên cidî bi dewleta Libnanê re nînin û astengiya herî mezin a li pêşiya aştiyê, Hizbullah e.
