Rêveberiya Xweser a Demokratîk a Bakur û Rojhilatê Sûriyeyê bang li hêzên demokratîk û mirovî yên li Sûriyeyê û cîhanê kir ku bi gelê Şêxmeqsûd û Eşrefiyê re bibin yek û ji bo parastina sivîlan tev li seferberiyê bibin.
Rêveberiya Xweser a Demokratîk a Bakur û Rojhilatê Sûriyeyê der barê êrişên li dijî taxên Helebê de daxuyaniyek nivîskî da. Daxuyanî wiha ye: “Rêveberiya Xweseriya Demokratîk a Herêma Bakur û Rojhilatê Sûriyeyê bi fikar û şermezarkirineke mezin zêdebûna metirsîdar, binpêkirin û êrişên berdewam ên li ser taxên Şêxmeqsûd û Eşrefiyê yên Helebê dişopîne, ku ji aliyê komên girêdayî hikûmeta demkî ya Sûriyeyê ve têne kirin û bi awayekî sîstematîk sivîlan hedef digirin
Nekarîna van aliyan ji bo pêşketineke leşkerî li ser erdê, hiştiye ku ew siyaseteke topbarankirina bêserûber û bi zanebûn pêk bînn. Bi çekên giran ên wekî tank û topan, û hedefgirtina taxên şêniyan, nexweşxane û saziyên xizmetguzariyê êrişên xwe pêk tînin. Ev yek bi eşkereyî hemû qanûn, û peymanên navneteweyî û mirovî binpê dikin û prensîbên herî bingehîn ên parastina sivîlan di dema pevçûnan de paşguh dikin.
Em diyar dikin ku hedefgirtina dubare ya nexweşxane û navendên tenduristiyê yên li taxên Şêxmeqsûd û Eşrefiyê, ku gelek caran hatiye dubarekirin, nikare wekî kiryarek tesadufî yan şaştiyek leşkerî were hesibandin, lê belê wekî kiryarek bi zanebûn hatiye hesibandin ku armanc jiyana li her du taxan tevlihev bikin û şêniyan ji mafê wan ê dermankirin û lênêrîna tenduristiyê bêpar bikin.
Berdewama van sûc û binpêkirinên giran gefa pêkanîna komkujiyan li dijî sivîlan dixwe, û digihîje sûcên şer , nemaze ji ber beşdarbûna komên ku sembolan hildigirin û îdeolojiya rêxistina terorîst a DAIŞê dişopînin, ku piştrast dike ku ev êrîş ji bilî berfirehkirina heman rêbaza terorê bi enî û rêbazên cûda tiştek din nîn in.
Em dewleta Tirkiyeyê rasterast ji van sûcan berpirsiyar dibînin. Ji ber ku di çarçoveya polîtîkayên xwe yên ku armanc dikin bêîstîqrar û têkbirina îradeya gelên azad, û tolhildana ji herêmên ku di berxwedana li dijî terorê û parastina nirxên mirovahiyê de rola herî berbiçav lîstine, piştgiriyê dide van aliyan.
Di vê çarçoveyê de, em rêz û hurmetên xwe ji bo gelê berxwedêr ê Şêxmeqsûd û Eşrefiyê û ji bo qehremanên Hêzên Ewlekariya Hundirîn û hemû hêzên berxwedanê yên ku bi mêrxasî parastina sivîlan dikin û rûmeta wan li hember vê êrîşa hovane diparêzin û wêneyên herî bi baldar ên berxwedan û hevgirtina neteweyî dinivîsin, silav dikin
Em bangeke lezgîn ji gelê Sûriyeyê bi hemû pêkhateyên wê û ji hemû gelên azad û hêzên demokratîk ên cîhanê dikin ku bi gelê me yê li Şêxmeqsûd û Eşrefiyê re bibin yek û piştgiriyê bidin berxwedana wan a rewa li hember van êrîşên sûcdar û helwesteke zelal û tund li hember sûcên li dijî sivîlan têne kirin, bigirin.
Em bang li civaka navneteweyî û hemû rêxistin û saziyên mafên mirovan ên navneteweyî dikin ku bi lez û bez mudaxele bikin da ku dawî li van binpêkirinan bînin, rêya sûcdaran bigirin, li gorî qanûnên navneteweyî hesab bidin û pêşî li bombebarankirina deverên şêniyan û komkujiyan li dijî gelê ku di rêza yekem a wan kesan de bû ku li dijî terorê li ber xwe da û hemû mirovahî parast, bigirin.
Di dawiyê de, em giyanê şehîdên berxwedanê yên ku ji bo parastina ax û rûmeta gelê xwe canê xwe feda kirine bi bîr tînin. Em soza xwe ya şopandina rêya wan nû dikin, û ji birîndaran re şifaya lezgîn dixwazin û ji malbatên şehîdan re sersaxiyê dixwazin, û em diyar dikin ku îradeya jiyan û berxwedanê ji hemû hewldanên tunekirin û êrîşkariyê xurttir e.”
