Şerê di navbera Îsraîl û Îranê de didome. Di êrişên Îranê de nêzî 100 kes birîndar bûn û nexweşxaneyek jî ji êrişê bi bandor bû. Piştî vê êrişî Îsraîlê ferman da ku êriş bên zêdekirin.
Şerê di navbera Îsraîl û Îranê de di roja 7an de didome. Êrişên Îsraîlê di tevahiya şevê de domiyan û Îranê jî bi dehan fuze avêtin Îsraîlê. Ji ber êrişa bi fuzeyan, li gelek herêmên Îsraîlê banga hişyariyê hate kirin û xelkê herêmê ji bo demekî kin xwe spartin stargehan. Li gorî medyaya Îsraîlê, di êrişan de 3 jê rewşa wan giran bi giştî 65 kes birîndar bûn. Nexweşxaneya Soroka ya li Beershevayê jî ji êrişên Îranê bibandor bû.
Li gorî nûçeya IRNAyê ya Îranê, di pêla êrişan a dawî de biryargeha îstîxbarata Îsraîlê û baregeha leşkerî ya artêşa Îsraîlê ya li nêzî Nexweşxaneya Sorokayê hedef hatin girtin.
Nêzî 100 kes birîndar bûn
Di êrişê de nêzî 100 kes birîndar bûn û rayedarên nexweşxaneyê gotin “Xesareke cidî çêbû.” Wezîrê Parastinê yê Îsraîlê Katz, got: “Dîktatorê tirsonek ê Îranê nexweşxane û malên li Îsraîlê bi zanebûn hedef digire. Ev, sûcên herî giran ên şer in. Dê Hamaney ji ber van sûcên xwe hesabê bide. Tevî Serokwezîr (Binyamin Netanyahu) me ji bo tunekirina gefên li dijî Dewleta Îsraîlê û ji bo hejandina rejîma Ayetullah, ferman da ku hedefên stratejîk ên li Îranê û binesaziya li Tehranê bi dijwarî hedef bên girtin.”
Netanyahu, li ser hesaba xwe ya Xyê got: “Dîktatorên terorîst ên Îranî, fuze avetin Nexwşxaneya Soroka ya li Beershevayê û sivîlan. Em ê bedelekî giran bi zordestên li Tehranê bidin.”
‘Dema tarîkirina Tehranê hatiye’
Wezîrê Veguhestinê yê Îsraîlê Miri Regev jî piştî êrişa Îranê ya danê sibehê got: “Dema tarîkirina Tehranê hatiye.” Regev, li ser hesaba xwe ya medyaya dijîtal got ku ew ê êrişên li dijî Îranê bidomînin.
Donald Trump planên êrişê yên li dijî Îranê erê kir
Li gorî nûçeya Wall Street Journalê, Serokê Amerîkayê Donald Trump, planên êrişê yên Amerîkayê yên li dijî Îranê erê kir. Hat îdiakirin ku Trump li Odeya Rewşê bi şêwirmendên xwe re civiyaye û fermana xwe ya dawî ji bo hîn bibe ka Tehranê dev ji biryara xwe ya bernameya nukleerê berdaye yan na, taloq kiriye. Li gorî nûçeya Bloombergê jî dibe ku Amerîka di dawiya hefteyê de êrişî Îranê bike. Lê hêj jî îşareteke zelal a Trump daxilî şerê Îran-Îsraîlê bibe zelal nîne.
Rûsyayê daxuyanî da
Berdevkê Kremlînê Dmitry Peskov jî diyar kir ku mudaxileyeke Amerîkayê ya şerê Îsraîl-Îranê dê rê li ber “şerekî dijwar veke.”
Bombebaranên her du welatan jî hêj berdewam in.
